طوطے شاہ

74ویں لڑی

حضرت طوطے شاہ دی قبر مبارک دھرتی توں کوئ تراے فٹ اچی ہئ، تے لمباݨ اچ وی عام. قبراں دے مقابلے ݙوڑی ہئ

قبر دے متھے تے ہک وݙا سارا ساوا جھنڈا ہا جیندے ٻاہروں لیس لڳی ہوئ ہئ، جھنڈے دی ݙانگ دے منڈھ اچ  سڄےتے کھٻے پاسوں ݙیویاں دی قطار ہئ، ہر ݙیوے اچ. سریم داکجھ نہ کجھ تیل موجود ہا، نال کپاہ دے ٻݨوے وی پے ہن، . نلیاں وٹݨ کیتے، تیل وٹیجݨ دی وجہ توں قبر دا متھا تھندا تھیا پیا ہا باقی قبر تے صفائ شاندار ہئ ݙوجھا وݙی بلا ڄال قبر اتے چھاں کیتی کھڑی ہئ،

قبر دی سڄی چنڈ اچ ہک مٹی دا وݙا سارا پیلہ موجود ہا جیڑھا لوݨ نال بھریا پیاء ہا، ایہ لوݨ شفاء ہا، جینکوں سڄے ہتھ دی شہادت آلی انگل دے ݙوݙے نال چھکݨا پوندا ہا روائت ہئ جو، کیہں بندے کوں سستی،  نہ مردی، جریان، . احتلام، آتش رحم، بندش رحم باؤ گولہ مدا کوئ ظاہری یا باطنی بیماری ہووے زری ہک ایہ لوݨ چٹݨ نال شفاء تھی ویندی ہئ ہیں سانگوں ایں لوݨ کوں،، نمک شفاءسݙیندے ہن،

ایں لوݨ بارے مرید ݙسیندے ہن  جو حضرت طوطے شاہ ایہ لوݨ کھیوڑہ دی کھاݨ جہلم اچوں آپݨے جن مریداں کنوں منگوایا ہا، ایہ کوئ پاء کھن جیتی ہا تے ہا وی ہک روڑی دی شکل اچ،

  حضرت طوطے شاہ اینکوں تلے تے رکھ رڳڑیا تاں ایہ بلکل میہن تھی ڳیا، روائیت ہئی جو مریدین دیگر ویلے تئیں ایہ لوݨ چٹیندے ہن جے کوئ ݙینہہ لہݨ دے بعد چٹے ہا تاں ول ایہ لوݨ اثر نہ کریندا ہا، رات کوں ایہ پیالہ خالی تھی ویندا ہا تے سویرے سویرے ول بھریا پیا ہوندا ہا،

قبر مبارک دے بلکل سڄے پاسوں ہک ٻئی گھاٹی ٻٹ ڄال ہئی ساڳی مزار مبارک دی ڄال وانگوں ہوندے جیݙا قد،. ہوندے وانگوں گھاٹی، ہݨ اللہ ڄاݨے ایں ڄال دی بھیݨ ہئی، بھرڄائ ہئی  سوتر مسات، یا ملیر

ایں ڄال کوں بخت فقیر تے اوندے چیلیاں اندروں چنگی طرحاں چھانڈ بلکل روہیلے گوپے وانگوں بݨایا ہویا ہا، ڄال دے اندر ٻوہاری پھری ہوئ ہئ، تلے پڑچھے وچھے پے ہن تے انھاں اتے ٹکڑانویاں گندیاں، ڄال دے منڈھ اچ چار دلے،، گھڑے،،  کورے پاݨی دے بھریے پے ہن، ہر دلے اتے ہک کوری ݙولی موندھی تھی پئ ہئ،  ڄال دے منڈھ دے بلکل سامݨے کوئ تراے فٹ تے ہک نکا جیہاں کھݙا ہا جیندے اچ،، ساوی،، گھوٹݨ کیتے دورا مولھا موجود ہا نال ڄال دی ہک سکی لڑی تے چٹا کھیر ویل دا کپڑا سکدا کھڑا ہا جیندے نال علی دے ملنگ ساوی چھݨیندے ہن،. ڄال دے منڈھ اچ تے کجھ اتے ٻیسانگیاں اچ ملنگاں دے کپڑے تے مݨکیاں دے ہار ٹنگیے کھڑے ہن،

ہوں ویلے بخت فقیر تے اوندے  چار سنگتی ساوی گھٹیندے ٻیٹھے ہن ڄال دے اندر اندھارا ہا بخت فقیت موٹر دا الا سݨ آکھیں تے ہتھ رکھ نجھا تے ٻاہر ݙٹھا تاں سردار فرید خاں اوندی گھر آلی تے ٻال موٹر توں تلے لتھے کھڑے ہن،

بخت فقیر ݙنڈکا نال آلے سنگتی کوں ݙتا تے اٹھی کھڑا تھیا ڈیڈھا سنبھالیس چوݨیاں اچ انگل پھیریس ڳل دے مݨکے سدھے کر بغیر چولا پاتے ڄال اچوں ٻاہر نکل آیا کجھ نیڑے آ اوں فرید خاں کوں سنڄاݨ گھدا تے چھک تے نعرہ لایا

جھولے لال، ٻیڑے پار، دشمن دا وار خطا، چڑھی کمان، دعا علی دے ملنگ دی حق حق حق

فرید خاں وی بخت فقیر کوں سنڄاݨ ڳل لایا تے ٻولیا

اوہے ہوے،

چاچا بخت توں تاں ٻہوں ٻڈھڑا تھی ڳئیں، بخت فقیر ولدی ݙتی

فرید خاں آپ کوں وی ݙیکھ توں وی ڄݙاں شہر پڑھݨ ڳیا ہانویں چوݙاں پندھراں سالاں دا ڳھبرؤ ہانویں تے ہݨ،،،،،

فقیر ول نعرہ ماریا تے فرید خاں دی گھر آلی در ٹریا ہتھ اڳوں تے کیتس تاں بیگم فرید سر نوا ݙتا، فقیر سر تے ہتھ پھیریا ٻالاں کوں ڳل لایس ول بھڄ تے قبر مبارک توں چار ساویاں جھلاں چاء آیا ہک فرید دے ڳل پاتس ہک اوندی بیگم دے ݙوجھی تے تریجھی فرید خاں دے پتراں دے ڳل پاء بیگم فرید دے نیڑے تھی نعرہ لایس

جھولے لال، ٻیڑے پار

یا علی یا علی

ٻچہ اللہ تیکوں ہک سوھݨی تے بختاں آلی دھی ݙیوے

دھی دی دعا سݨ بیگم فرید خوش تھی ڳئ اوں ٹھک پک پرس کھولیا تے ہک ہزار دا کڑکڑاں نوٹ بخت فقیر کوں دان کیتا

جھولے لال ٻیڑے پار

باقی کل

14جون2024ء

ملتان شریف

باسط بھٹی