صوفی نجیب اللہ نازش

سئیں صوفی نجیب اللہ نازش 1954ء اچ سئیں قادر بخش مرحوم دے گھر ڄمئے ۔ مڈل تئیں تعلیم حاصل کیتی ۔ آپ ہِک علمی ادبی گھرانے نال تعلق رکھیندن ۔ 1983ء اچ شاعری شروع کیتی تاں امیر بخش خان دانش دے شاگرد بݨیئے ۔ نازش دے ݙوہڑے ، توں تاں وفا کریں ہا ، میݙا دیس، زکریا ایکسپریس دی ٹکر، پتہ نی توں کیا ہِیں آپ دیاں مشہور کتاباں ہِن ۔ صوفی نجیب اللہ نازش تے انہاندے خاندان دیاں سرائیکی واسطے عظیم خدمات ہِن ۔ انہاندے بھرا صوفی فیض محمد دلچسپ دے سینکڑاں شاگرد ہِن ، صوفی صاحب دے اپݨے وی شاگرد سو توں ودھ ڳن ، آپ سرائیکی گیت دے بے مثال شاعر ہِن ۔

جڈاں تئیں محبت بھلا ڈیوݨی ہے اساں اپنی زندگی مکا ڈیوݨی ہے

مریندا ہیں ساکوں غریبی دے طعنے اساکوں وی روزی خدا ڈیوݨی ہے

محبت دا ناں سنڑ تے چھرکیاں بھریسے ایں دل کوں ایہو جیں سزا ڈیوݨی ہے

جیندی دید سینے دے اندر نی پوندی بشارت اوں محشر دی کیا ڈیوݨی ہے

جیڑھی قوم نندراں کرے اکھ نہ بھالے خدا قوم ایجھی مٹا ڈیو٘ݨی ہے

خبر ڈیسوں نازش ازل توں حشر تئیں جڈاں ساقی ڈو گھٹ پلا ڈیوݨی ہے

میݙا جہاں میݙی عاشقی ' میݙی سلطنت میݙی شاعری

صدقے تھیواں کتھ آ کھڑئے' میکوں میݙی آوارگی

زر مال نا جاگیر ھ ' میݙا فخر تسخیر ھ سامہے ہکا تصویر ھ ' میݙی ھ وکھری بندگی

سڄݨاں دے تھئے احسان ہِن ' درداں دے تحفے دان ہِن

کجھ لوک تھئے حیران ہِن' ݙہدن نظر حسرت بھری

میݙا عقیدہ ھ وفا ' میݙی عبادت ھ جدا میں مست ہاں کہیں نال کیا ' نا دشمنی نا دوستی

ݙکھڑے توں میں ݙردا نمہی' پک ھ میکوں ہردا نمہی نازش میں ہݨ مردا نمہی' میݙے گیت ہِن میݙی زندگی

حوالہ

کتاب: میݙی دھرتی، میݙے لوک ، مصنف: ظہور احمد دھریجہ ، ناشر: جھوک پبلشرز ، ملتان 2018ء