صوفی رکھیل شاہ

صوفی رکھیل شاہ بلوچستان دے ہک مشہور درویش ہن۔ انھاں دا نسب نامہ حضرت علیؓ نال ونڄ رَلدے۔ آپ دے وڈکے عراق دے رہݨ والے ہن۔ عباسی خلیفہ ہارون الرشید دے زمانے انھاں دے ڈاݙے سخی سید میاں ولی محمد شاہ ہوراں ہجرت کیتی تے بلوچستان وچ آ ویسے۔

او آہدن:

ہر مومن مسلمان کوں شالا ملک عراق ݙکھائے

ونڄ ݙیکھن او نہیں نگری کوں جتھاں سُتا چن زہرا اے

والیٔ قلات آپ دے خاندان دی ٻہوں عزت کیتی تے جاگیراں انعام وچ ݙتیاں۔

سید رکھیل شاہ صوفی دی پیدائش 1262ھ وچ سید نور محمد شاہ دے گھر فتح پور علاقہ گنداوا میر پور وچ تھئی۔ جوانی وچ آپ کوں شکار دا ٻہوں شوق ہئی۔ ہک واری ہک نَہر کوں شکار کتونے۔ حضرت شاہ عبدالغنی فرمایا کہ ناہر مار تے ایݙا خوش پیا تھیندیں ۔ نفس دا ناہر ماریں تاں کیݙی خوشی دی ڳالھ ہئی۔ اے سُݨ تے سارے شوق سٹ گھتیونے اتے شاہ صاحب دی صحبت وچ رہن لڳ پے۔

حضرت صوفی رکھیل شاہ فقیری مزاج دے مالک ہن۔ طبیعت اِچ ککھ غرور نہ ہا۔ ہر ویلے فقیراں ‘ مریداں تے خادماں کوں نیکی دی تلقین کریندے رہندے ہن۔ کوئی سوالی دَر توں خالی نہ ویندا۔ ہر سال یکم مارچ کوں آپ دا عرس مبارک تھیندے۔ آپ دا روضہ مبارک فتح پور شریف وچ ہے۔

                      صوفی رکھیل شاہ دی شاعری صوفیانہ انداز دی ہے۔ آپ دنیا دے بے ثباتی ‘ نفس دی نفی‘ خدمتِ خلق تے انساناں نال محبت دا درس ݙتے۔ آپ دا ہک مجموعہ کلام ’’بحرالعشق‘‘ دے ناں نال ھرڳن ول کندومل نے چھاپیاں ہئی۔ کافی ملاحظہ کرو۔ حضرت خواجہ فرید دا رنگ صاف نشابر ہے۔

کافی:

جب دلبر شکل جہان ݙٹھم

ہر صورت عین عیان ݙٹھم

تساں ہر رنگ دے وچ وسدے ہو

کتھے رہبر تھی پے ݙسدے ہو

کتھے مار دھاڑدل کھسدے ہو

کتھے جنگ کتھے انجام ݙٹھم

کتھے عالم تھی ٻہہ درس پڑھاوے

کتھے دیر کنشت برہمن ڳاوے

کتھے حاکم ہوکے حکم چلاوے

کتھے حیرت وچ حیران ݙٹھم

کتھے ہستی ہے کتھے مستی ہے

کتھے نرمی ہے کتھے سختی ہے

کتھے بار برہ دل خستی ہے

کتھے راز رکھیل تے رحمن ݙٹھم