صوبے دا ایشو

اوے جنوبی پنجابی ائیدر نو آ

شہزاد عرفان

پی پی پی دی طرفوں سرائیکی صوبے دے ایشو کوں الیکشن سلوگن بنڑاونْ دا کوئی اعلان جلسہ ءچ کیتا گیا ہوے تاں ڈسو ۔۔۔۔۔ لفظ "سرائیکی" پورے جلسے ءچ ہک واری کہیں وی ریفرنس ءچ نہیں ورتیا گیا۔۔۔۔۔۔ پی پی پی ءچ سرائیکی ایشو بی بی شہید تائیں ہائی باقی اسٹبلشمنٹ دی کھیڈ ہے سبھے اقتدار کیتے۔۔۔۔ فوجیاں ہتھ ڈوروں ء تے باقی سبھے ناچے۔۔۔۔۔۔ نظریہ، فلسفہ، جمہوریت ، کلچر سیاست بی بی دی آخری ہِڈکی نال مک گئی ہائی۔ کیا کوئی قوم اپنْی سُنجانْ شناخت دے بغیر اپنْی سیاسی حد بندی تے اپنْے حقوق دی بحالی دا دعویٰ کرسگدی ءے ؟ فرض کرو جو پی پی پی دے زرداری فیملی صوبہ بنْا ڈیون تے او وڈے پنجاب دا ہک بیا چھوٹا پنجاب ہوسی ۔۔۔ اساں پہلے پنجابی ہاسے وت اساکوں جنوبی پنجابی بنْیندے پئیں ۔ سرائیکی صوبہ تاں وت وی نہ بنْا ۔۔۔۔ پی پی پی یا بئے سیاسی جماعتاں بھانویں ویہہ صوبے بنْا ڈیون اساکوں اوندا کیا فائدہ ۔۔۔۔ البتہ سرائیکی دھرتی تے اوندی سرائیکی عوام کوں بے حد تاریخی نقصان تھیسی جو اساڈا بنیادی اصولی تے سائنسی سوال " سرائیکی صوبہ" ہمیشہ وسطے مک ویسی ۔ اساں ہمیشہ وستے جنوبی پنجابی بنْ ویسوں۔ اے جیہڑے دوست سرائیکی سرائیکی کرتے وسیب ءچ پی پی پی کوں آکسیجن ماسک لائی کھڑن او دراصل صرف خالص جیالے ہن جیہڑے سرائیکی قومیت دے تحریکی کارکن دا ویس وٹائی ودن تے ووٹاں وستے اپنْی پارٹی کوں اقتدار ءچ ڈیکھن چاہندن ۔۔۔۔ بے شک اے انہاں دا جمہوری حق ء پر سرائیکی سرائیکی دا ڈھونگ بازی کرتے قومی سوال کوں اسٹبلشمنٹ دے ہتھ نہ ویچن ۔ ۔۔ اے جماعتئے قسم جیالے ہالی تئیں اپنْی سندھی قیادت کوں سرائیکی صوبہ دا سیاسی کیس بیان نئیں کرسگے بلکہ ہتھوں سرائیکی صوبے دا کیس برباد کیتے نے ۔۔۔۔ انہاں جیالیاں وسیب دا کیس لڑن دی بجائے جُھمرتماشہ پاتے اپنْا کتھارسس کرتے پی پی پی دی نوعمر قیادت کوں بدراہ کیتے نے۔ ۔۔۔۔ جیکر اے سنجیدگی نال پی پی پی کوں سرائیکی سوال نال جوڑن ہا تے الیکشن ءچ پی پی پی دا سرائیکی وسیب ءچ الیکشن جیتنْ دا امکان موجود ہائی پر انہاں کاریگراں پی پی پی دا تڈا وسیب ءچوں پٹ ڈتے۔اے اوہے ہن جنہاں 86 ءچ اپنْییاں پی پی پی کنیں نوکریاں پکی کرتے بدلے ءچ بنْی جُڑی سرائیکی تحریک ویچی ہانے ۔۔۔۔ سرائیکی لوک سانجھ ویچی ہانے۔۔۔۔۔ سوچنْ دی گالھ ء جو وفاق دی سندھی قوم پرست جماعت کوں سرائیکی دی بجائی جنوبی پنجاب بنْاونْ تے پنجاب کوں تقسیم کرنْ دی کیا لوڑھ پئے گئی ء؟ انہاں وفاق پرست سندھیاں ہک تیر نال ڈو شکار کرنْ دا شوق فرمیندے پئین۔۔۔۔۔ موجودہ پنجاب دی طاقت کوں کمزور کرنْ تاں جو وفاق ءچ سندھیاں کو پنجاب دے پاسوں گھٹ مزاحمت ملے تے اقتدار کوں دوام ملے ۔۔۔۔۔ ڈوجھا تے اہم ایشو سرائیکی تحریک دا خاتمہ سندھیاں دی بقاء دی ضمانت ء کیوں جو سندھ ءچ ابادی دے لہاذ نال سرائیکی زبان بولنْ آلے سندھ دے سرائیکیاں اپنْی سرائیکی دی تحریک شروع نہ کرڈیون۔۔۔۔ کیوں جو جیہڑا حال پنجابی موجودہ پنجاب ءچ سرائیکیاں نال کیتی کھڑے اوں توں زیادہ سندھ ءچ سندھی وڈیرہ سرائیکی غربت زدہ آبادیاں نال رکھی کھڑے۔ سرائیکی تحریک سندھ ءچ سرائیکی صوبے دا مطالبہ کھڑا کرسگدی ء۔۔۔۔۔۔۔۔ اے سیاست ء تے او وی 2018 ءچ جتھ ہنْ تھنْاں دا بال وی جانْدے جو پختون دائیں و بائیں بازو دی حکومتی تے غیر حکومتی پارٹیاں تحریکاں چلا چُت پُٹھی کرتے وی اپنْے صوبے دا ناں پختون خواہ نہ رکھوا سگے جے تئیں پی پی پی نے انہاں کوں قومی ناں " خیبر پختون خواہ" نئیں ڈتا تے اج اتھاں کیہڑا گڑا پے گئے جو لفظ " سرائیکی" ایسا مندا بنْ گئے جو بلاول زرداری دے منہہ ءچوں نہیں نکلدا البتہ جنوبی پنجاب جیہڑھی جو فوجی پنجابی اسٹبلشمنٹ دی ٹرم ء اوندا ورد تھیندارہ گئے۔ پنجابی تے جنوبی پنجابی ءچ کیا فرق ء کہیں کوں نئیں نظردا؟ پچھلے تریہہ سالاں دا سرائیکی قومی سنجانْ تے شناخت دا سفر طے کیتے سے کوئی صوبہ یا حکمرانی نئیں کیتی ۔ اے سیاسی بُزنگی ء جنوبی پنجابی صوبے دی۔ اے دراصل اڈمنسٹریٹنگ یونٹ بنْاونْ چاہندن جیہڑا مشرف تے اوندے چوہدری برادران ق لیگی چاہندے ہن۔ اساڈی تریہہ سالہ سرائیکی تحریک تے قومی سوال دا خاتمہ اینویں ممکن ء جو ایں سیاسی سوال کوں جنوبی پنجاب تے بہاولپور صوبہ دی صورت ءچ ہمیشہ وسطے دفنا ڈیوں ۔ یعنی جیہڑا کم پنجابی نہ کرسگے او سندھیاں کر ڈکھایا جنوبی پنجاب تے بہاولپور صوبہ دا نعرہ لاتے۔۔۔۔۔ کل دے لونڈے سرائیکی تحریک وں ہائی جیک نئیں کرسگدے ۔۔۔۔ لوک ہوشیار ہن۔۔۔ شہزاد عرفان