صوبہ سرائیکستان دے فائدے

اساݙا انج صوبہ ، اساݙی انج شناخت دا ضامن ہوسی۔ اساݙی ماء بٖولی کوں وی اوندا حق ملسی تے اوندی ترقی تے بہتری واسطے کوئی رکاوٹ نہ راہسی۔ صوبہ سرائیکستان بݨݨ دے بعد اساݙا اپݨا گورنر ، چیف سیکرٹری ، سپیکر اسمبلی تے منسٹر ہوسن جیرھے اساݙے اپݨے وسیب دے عوام کوں جواب دہ ہوسن۔ سینیٹ وچ اساݙا اپݨا انج کوٹہ ہوسی تے ساݙے وسیب دے لوک ای سینیٹر ہوسن۔

وسیب دے تعلیم یافتہ تے مالدار لوک وی لاہور، پشاور دی بجائے وسیب ءِ چ رہوݨ پسند کریسن۔ساݙا اپݨا صوبائی سیکرٹریٹ تے سول سروس ہوسی جیرھی اساݙے وسیب دے ترقیاتی پروگرام ترتیب ݙیسی تے مکمل کرویسی تے ایں طرح وسیب دے سارے مسئلے حل تھیسن۔اساݙی اپݨی ہائیکورٹ ہوسی تے سپریم کورٹ دا بنچ ہوسی، سی ایس اسی وچ انج کوٹہ ہوسی ، اساݙا انج پبلک سروس کمیشن ہوسی جیرھا صرف وسیب دے نینگراں کوں ملازمتاں ݙیوݨ دا پابند ہوسی۔

اساݙی اپݨی پولیس ہوسی جیندے وچ وسیب دے جوان بھرتی تھیسن تے فوج وچ سرائیکی رجمنٹ ہوسی ۔ اساݙے صوبے دے سب سرکاری تے نیم سرکاری محکمیاں وچ نوکریاں وسیب دے نینگراں کوں ملسن تے کئیں بٖئے علاقے دے لوک قبضہ نہ کر سگٖسن۔ ساݙے صوبائی محکمے اساݙے لوکاں واسطے ہوسن ۔ اساݙے لوکاں دے قریب ہوسن ، فارن سروس وچ حصہ ملسی ۔

ساݙا اپݨا انج صوبائی بجٹ ہوسی جیرھا صرف سرائیکی وسیب واسطے خرچ تھیسی ، پاݨی دے وسائل وچ برابر حصہ ملسی ۔اساݙے وسیب ءِ چ زرعی آمدن، دولت تے وسائل وسیب دی ترقی واسطے خرچ تھیسن تے لوکاں دی معاشی حالت بہتر تھیسی ۔اساݙے صوبے دا انج تعلیمی بجٹ ہوسی جیندی وجہ توں بے شمار تعلیمی ادارے قائم تھیسن تے شرح تعلیم ودھسے ، زیادہ تعلیم زیادہ خوشحالی دی ضمانت ہوسی ۔

اساݙے صوبے دے اعلیٰ تعلیمی اداریاں وچ صرف وسیب دے بٖالاں کوں داخلہ ملسی ۔سرائیکی وسیب ءِ چ یونیورسٹیاں ، کیڈٹ کالج تے اعلیٰ تعلیمی ادارے بݨسن ۔ سرائیکی وسیب ءِ چ ٹیکس فری انڈسٹریل زون بݨسن تے انڈسٹری قائم تھیسی ، بے روزگاری ختم تھیسی ۔

اتھاں رہݨ آلے سرائیکی ، پنجابی ، پٹھاݨ تے مہاجر بھرا سہولتاں توں برابر فیدے چیسن۔ تخت لاہور تے تخت پشور دے دھکے تے سرائیکی دشمن افسراں دے ہتک آمیز سلوک توں جان چھُٹ ویسی۔ سرائیکی وسیب دے وسائل لاہور تے پشور دے کارپٹ سڑکاں ، میل ہا میل لمبے پارک ، فلائی اوور پل، رنگ روڈ تے مونوریل تے خرچ نہ تھیسن ۔

حوالہ

معروف سرائیکی لکھاری سئیں ظہور احمد دھریجہ دی کتاب (سرائیکی اجرک) وچوں چوݨ