صوبہ سرائیکستان دی مخالفت دی وجہ؟

تخت لاہور تے تخت پشور دے استحصالی تے متعصب لوک اساݙے وسیب کوں اپݨی کالونی سمجھدن تے ایندے اُتے قبضہ جاری رکھݨ چاہندن تاں جو:۔

سرائیکی وسیب تے انہاں دی حکومت برقرار رہوے تے او مظلوماں تے ظلم کریندے رہون ۔سارے سرائیکی وسیب ءِ چ انہاں دے لکھاں لوک متواتر نقل مکانی کر تے آباد تھیندے رہون۔ ایں طرح کجھ عرصے بعد مقامی آبادی دا تناسب گھٹ تھی ونڄے تے مقامی لوک اقلیت بݨ ونڄن۔ سرائیکی وسیب دے وسائل انہاں دے کنٹرول وچ رکھݨ کیتے لمبی منصوبہ بندی تے عمل تھی سڳے۔

صوبہ پنجاب دے سارے بجٹ کوں اپݨی مرضی دے مطابق خرچ کر سڳن تے پشاور والے دیرے تے ٹانک دی زرخیز ترین سرائیکی دھرتی دے وسائل اپݨے مکروہ مقصداں سانگے خرچ کر سڳن۔ اپݨے علاقیاں کوں جاپان تے کوریا تے سرائیکی وسیب کوں صومالیہ تے ایتھوپیا بݨایا ویندا پے۔ علاقائی زباناں تے ثقافت دی ترقی واسطے ملݨ آلی گرانٹ اپݨے علاقیاں وچ خرچ کر سڳن۔وسیب دے تمام سرکاری تے نیم سرکاری محکمیاں وچ سرائیکی نینگراں کوں میرٹ دے بہانے نوکریاں توں محروم کر سڳن تے اپݨے لوکاں کوں بھرتی کر سڳن تے سرائیکی وسیب تے تمام اعلیٰ عہدیاں تے انہاں دے افسر برا جمان رہون۔

پرائیوٹ محکمیاں وچ وی انہاں دے لوک آسانی نال نوکری کر سڳن۔ سرائیکی وسیب دے  سارے تعلیمی اداریاں وچ انہاں دے ٻال آسانی نال داخلہ گھن سڳن تے اساݙے ٻال کوں محروم رکھ سڳن۔ انہاندیاں اولاداں افسر تے وسیب دیاں اولاداں نوکر بݨدیاں رہن۔

اندرون تے ٻاہرلے ملک اعلیٰ تعلیم واسطے تقریباً سارے سکالر شپ زیادہ تر قبضہ گیر ، طالب علم حاصل کر سڳن۔سرائیکی وسیب ءِ چ بزنس تے کاروبار واسطے اپݨے لوکاں دی ہر طرح مدد کر تے انہاں کوں خوشحال کرن ۔ سرکاری تے کمرشل بنکاں ءِ چ تمام عہدیاں تیقبضہ راہوے تاں جو اپݨے لوکاں کوں بھرپور مالی فائدہ ݙے سڳن ۔

سرائیکی وسیب دیاں زمیناں دی لُٹ مار جاری رکھی ونڄ سڳے۔ سرائیکی وسیب دے لوکاں کوں غلام تے جاہل رکھیا ونڄ سڳے۔ سرائیکی وسیب دی تجارت تے منڈیاں تے قبضہ برقرار راہوے ۔ سرائیکی وسیب خام مال دی منڈی تے وسیب دے لوک ’’ صارف ‘‘ رہ ونڄن تے انڈسٹری انہاندے علاقیاں وچ قائم تھیوے ۔ توسیع پسندی ، استحصالی تے قبضہ گیراں دے شہر سوہݨے تے سرائیکی وسیب دے شہر کھنڈر بݨدے رہ ونڄن۔

سرائیکی وسیب دیاں زمیناں دا ریکارڈ انہاندے ریونیو بورڈ کول راہوے۔ سرائیکی وسیب دے لوکاں کوں بودن، جانگلی ، بھکن بݨا تے رکھیا ونڄ سڳے۔ قبضہ گیر حکمران تے انہاندے جدی پشتی چیلڑے انہاں وجوہات دی بناء تے سرائیکی دی مخالفت کریندن تے نی چاہندے جو پاکستان دی سب توں وݙی تے عظیم سرائیکی قوم اپݨے سرائیکی دیس کوں انہاندے قبضے وچوں آزاد کر سڳے۔

حوالہ

معروف سرائیکی لکھاری سئیں ظہور احمد دھریجہ دی کتاب (سرائیکی اجرک) وچوں چوݨ