صوبہ سرائیکستان دا مطالبہ کیوں ؟

اساݙے ملک پاکستان دی بقاء تے استحکام کیتے صوبہ سرائیکستان دا قیام ٻہوں ضروری ہے ، کیونجووسیب  دے لوکیں دا صوبہ حق ہے ۔ وسیب دے لوک اپݨا حق تے سنڄاݨ منگدن۔ آبادی دے لحاظ نال پنجاب ٻہوں وݙا صوبہ ہے ، وفاق عدم توازن دا شکار ہے ، سرائیکستان نال صوبے متوازن تھیسن ، لٹیرے ڈاکو تے ظالم رنجیت سنگھ دے قبضے تے دیرہ و ٹانک بارے انگریز سامراج دے غلط فیصلے دا خاتمہ تھیسی۔

سرائیکستان دا جھنڈا

ملتان ہزار ہا سال توں ہک خومختار ریاست تے انج صوبہ ہا۔ 1818ء ءِ چ رنجیت سنگھ ایں تے قبضہ کیتا تے اے سارا علاقہ توسیع پسنداں دے ماتحت تھی ڳیا ۔صوبہ سرائیکستان بݨݨ نال سرائیکی وسیب کوں تخت لاہور تے تخت پشور دی غلامی توں نجات ملسی کیونجو اساݙے وسیب کو زبردستی انہاں صوبیاں دا حصہ بݨایا ڳیا ہا ۔

چھوٹے صوبے دے لوکاں کوں پنجاب کولوں ٻہوں ناراضگی ہے، اوندا خمیازہ ، جانی تے مالی نقصان دی صورت ءِ چ سرائیکی کوں وی بھڳتڑاں پے ۔ بلوچستان وچ سینکڑاں سرائیکیاں کوں پنجاب دا واسی آکھ تے مار ݙتا ڳے ۔ جرم اے ݙسیا ڳئے جو تُساں پنجابی ہیوے تے پنجاب ءِ چ راہندو ۔ حالانکہ سرائیکی خود پنجاب دے ظلم دا شکار ہن ۔

صوبہ پنجاب تے پختونخواہ مرکزہ کولوں آبادی دی بنیاد تے این ایف سی ایوارڈ دا ٻہوں زیادہ حصہ گھندا رہ ڳئے پر سرائیکی وسیب کوں اوندے جائز حصے توں مرحوم رکھیا ڳے۔ پچھلے سارے بجٹ تے موجودہ بجٹ دا ریکارڈ ایندا گواہ ہے۔ صوبائی بیورو کریسی سرائیکی وسیب دا استحصال کریندی اے، پلاننگ تے منصوبہ سازی نال اپݨے علاقیاں کوں ترقی تے سرائیکی وسیب کوں تنزلی دا شکار کیتی آندن ۔ لاہور تے پشاور وچ وسیب دے لوکاں دی توہین کیتی ویندی اے۔ آزادی توں پہلے متحدہ ہندوستان ءِ چ مسلماناں دا مذہبی بنیاد تے استحصال کیتا ویندا ہئی۔ ایں حق تلفی تے نا انصافی توں بچݨ کیتے مسلماناں انج ملک دا مطالبہ کیتا ، ملک بݨݨ دے بعد سرائیکی دا کراڑاں توں وی ودھ تے لسانی بنیاد تے استحصال کیتا ڳے ۔ اساں ول وی علیحدہ ملک نی منگدے بلکہ انج صوبہ منگدوں ۔

قیام پاکستان توں گھن تے اڄ تئیں سرائیکی وسیب تے سرائیکی عوام کوں تعلیم، اقتصادی ترقی تے معاشی خوشحالی دے عمل وچ شامل نیں کیتا ڳیا ۔ اے سلسلہ ہُݨ تئیں جاری ہے ۔ ہِیں واسطے اساں جغرافیائی ، ثقافتی تے تاریخی بنیاد تے اپݨے انج صوبہ سرائیکستان دا مطالبہ کریندوں۔ اساݙے ہمسایہ ملک ہندوستان ءِ چ سارے صوبیاں، سٹیٹ ری آرگنائزیشن ایکٹ آف 1956 دے تحت لسانی بنیادتے تشکیل نو کیتی ڳئی اتے ہِیں اصول دے تحت پندرہ ویہہ نویں صوبے بݨائے ڳئے ۔ اُتھاں وی پنجاب دے ترائے صوبے بݨائے ڳئے، لہٰذا اتھاں سرائیکی تے پوٹھوہار صوبہ ضروری ہے۔

حوالہ

معروف سرائیکی لکھاری سئیں ظہور احمد دھریجہ دی کتاب (سرائیکی اجرک) وچوں چوݨ