صندوقڑی
صندوقڑی
عبداللہ عرفان ملک
وت پورے وسیب اچ کئی اینجھا بنوارا آیاجو وسیب دا کرنگا ای اکھینداترٹ پیا، وسیب واسی کانا کانا تھی ڳئے، کئی ڄلئے کئی مرسدھاݨے تے جیڑھے بچ ڳئے اوگھتاں اچ لک وسر مول تھی کراہیں، اکھیں بھرکا بھرکا تے کھٹ کمت دے سبھݨاں وسیبی وسیلیاں کوں موٹے ڈھوراں واکن ڳجھیں توں تمبیندا ݙہدے رہے. بھلا اینجھے تماشے انہاں گھتاں اڳے ݙٹھے ای کݙݨ ہن جو کتھاوں کئی ڄنڈ ٻنا بچاوݨ کاݨ ٻکیں ہتھیں پووݨ دا دھرک مریندے. پر تھیا اے انہاں گھتاں اچ وی اکرس تے سوڑسنگوڑ شروع تھی ڳئی تے بکھ انج نچݨ لڳ پئی. پچھے اے وی ویہر ویلے تھیندے، پنگھر پونجھیندے، ڈڈھ دیاں سٻیاں کھولݨ سانگے ہک ٻئے توں نکھڑ ڳئے. وت جیویں چھل مینہہ آنوݨ توں اڳے کویلیاں اپݨیاں اڳلیاں آساں مراداں دے آنے چا کراہیں ایجھی تھارھاں سانبھ آندئین جتھوں ایں ݙر بھئو کنیں پچھے کڈھ پرتا وی آنون، ایویں ای ایں وسیبی بھویمپ اچ نکڑے ٻالاں نال وی تھیا ہا. انہاں دی ڄموڑ ال وی انہاں دیاں نکڑیاں نکڑیاں خوشیاں تے آساں دے ہلکے جیجاں کوں چا تے انہاں دی مجالی دے کہیں ایجھے اکھے اچ سانبھ آئی ہئی جیکوں او جوانی دے ٻے الکے ݙینہاں اچ ای ٻاہر ونڄ کڈھݨ ہݨ تاں اکھیندا ویلے کویلے دے ݙر بھئو دی انہاں کوں وی بھوم تھی ڳئی ہئی.
صندوقڑی..... ملک عبداللہ عرفان