صدر بزار دِلّی

اساں ہک سائیکل رکشہ گھدّا ۔اونیں صدر پُچاوݨ کیتے 40/-روپے منگے۔ اساں قبول کیتے اوہ ٹُر پیا ۔اونیں پُراݨی دِلی دی سیل کرا ݙتی ۔ ڳڑ منڈی ‘ پان منڈی ‘ غلہ منڈی ‘ دِرِیبہ ‘چیلوں کا کوچہ ‘ کھاری بائولی توں لنگھدا اوہ گھنٹے بعد صدر پُڄا ۔ بھیڑ دا ویلا ہئی۔ چِکڑ علاوہ ہئی ۔ ایہ شہر دا اندرونی سَوڑا حصہ ہا ۔ بر حال سیل کرݨ دا مزا آ ڳیا ۔ مسجد فتح پوری دے بعد دریبہ دا علاقہ جامع مسجد دے نا ل ہے ۔ اڳوں مختلف منڈیاں آندن ‘ پان منڈی دے بعد کھاری بائولی آ ڳیوسے ۔ ہک چوک وچوں لنگھ کے محلہ بلّی ماراں ݙٹھا ۔ ایہ سب مسلماناں دے علاقے ہن ۔ پُراݨے ‘ ݙاڈھے سَوڑے ‘ گندے ‘ چِکڑ نال بھرے ۔ لوکاں دی غریبی دوروں ݙسدی ہئی ۔ دِلّی وچ حیاتی کاتی تلے ساہ پئی گھندی ہے ۔ ہر بندہ مشین وانگ کم کریندے۔ فجر کنوں شام تئیں حیاتی دا گاݙا چِھکیندے ۔ پگھر وَہا وَہا کے اپݨا خون پیندے اَتے خون پی پی کے جیندے ۔ وَل اپݨاں لہو پورا کرݨ کیتے ݙو جھیاں دا لہو پیندے ۔پر محنت کش دے مونہ کوں رَت لڳی ہوئی ہے ۔ اَخیر اُنہاں دی رَت سیلانیاں دی رَت پی کے پوری تھیندی ہے ۔ دِلّی وچ ٹھڳی تے ڳنڈھ کپائی دا بزنس زوراں تے ہے ۔ قدم قدم تے لوکاں کوں ڳنڈھ کپاں کنوں ہشیار رہوݨ دی تاکید کیتی ویندی ہے ۔ میں محض کھیسے دی حفاظت کیتے پتلون پاتی رکھّی اَتے ہک ݙینہ دی سلوار نہ پاتی ۔ ایندے باوجود اجمیر دے ٹیشن تے ہک ڳنڈھ کپ میݙے بیگ کوں بلیڈ مار کے اپݨے فن دا مظاہرہ کر ڳیا ۔

اساں صدر اِچ پُچیوسے تاں ݙینہ لاٹ پلاٹی ہا ۔ ست وڄے مارکیٹ بند تھی ونڄݨاں ہا ۔ اساں جلتی جلتی ݙو چار شئیں مُل گھدّیاں ۔ مصنوعی جیولری اِتھاں مِل ڳئی۔ اِتی دیر اِچ ست وڄ ڳے۔ اَتے لوڈشیڈنگ تھی ڳئی ۔ اَساں پچھّاں مُڑیوسے۔ میٹرو تے ٻہہ کے بھون ول ایوسے۔

حوالہ

کتاب: دِلّی ڈھائی کوہ۔ مصنف شوکت مغل، چھپیندڑ: جھوک پبلشرز ‘ ملتان