صالح محمد صالح اللہ آبادی

صالح محمد صالح اللہ آباد تحصیل لیاقت پور دے رہݨ والے ہن۔ آپ حضرت خرم بہاول پوری سئیں دے شاگرد اِن۔ صالح اللہ آبادی دے کلام وچ ہو ٻہو خرم دا رنگ جھلکیاں مریندے۔ بنیادی طور تے ݙوہڑے تے کافیاں آہدن۔ انھاں دے کلام وچ زلانویں زبان دا بھر پور استعمال ملدے۔ عام ٻول چال دی زبان کوں شاعری وچ ورتیندن۔ آپ دے اکثر کلام کوں قٻولِ عام دی سند حاصل تھئی اے۔ صالح اللہ آبادی دی کافی ’’رُٹھے یار ݙاڈھے اوکھے منیندے ‘‘ بے حد مقبول تھئی۔ نمونے طور تے صالح اللہ آبادی دی ہک ٻئی مشہور کافی پیش ہے:

کافی

جانی رات رہ پو ڳالھیں کریسوں

مدتاں دے حال اِن ہک ٻئے کوں ݙیسوں

پھل ہار مصریاں ‘ ملایاں انانواں

ہتھیں پوانواں‘ ہتھیں کھوانواں

ہاں دَر دی ٻانھی غلامیاں کمانواں

جیویں اکھیسیں اونویں منیسوں

جانی رات رہ پو ڳالھیں کریسوں

سبھو ݙکھ سُݨیساں جیویںمیں نبھئی اے

میکوں پتہ ہے میݙے نال تھئی اے

جندڑی نماݨی رت روندی رہی اے

ݙے ݙے دلاسے اینکوں رہیسوں

جانی رات رہ پو ڳالھیں کریسوں

سسوں نناݨاں نت جھیڑے لیندین

طعنے مریندن ہر ویلے تیندین

سینڳیاں سہیلیاں جیڑھیاں مہݨے ݙیندن

انھاں کوں سݙیسوں مہݨے مُکیسوں

جانی رات رہ پو ڳالھیں کریسوں

من گھن وے من گھن ٹک پو اتھاہیں

قسمیں خدا دی سکدین اے جاہیں

لوں لوں اساݙی پئی ݙیسی دعائیں

خوشیاں منیسوں چُوریاں ونڈیسوں

جانی رات رہ پو ڳالھیں کریسوں

صالح سُݨیساں گزری وہاݨی

قصے ݙکھاندے‘ غم دی کہاݨی

قسمت بھرایم دَر دَر دا پاݨی

اینویں توں آہدیں تاں اینویں جلیسوں

جانی رات رہ پو ڳالھیں کریسوں

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان