صابر عطاء

اصل ناں       اللہ وسایا

قلمی ناں       صابرؔ عطاء

ڄمݨ           1982ء

تعلیم           بی اے

پیشہ           صحافت

فون نمبر        0300 8762327

جاہ پتہ         چوک اعظم ضلع لیہ

صابرؔ عطاء سرائیکی ، پنجابی تے اردو دے سہ زبان شاعر ہن ۔ آپ دے بے شمار گیت مختلف گلو کار ڳا چکے ہن۔ جݙاں جو صابرؔ عطاء دیاں سرائیکی غزلاں تے نظماں تے مشتمل شعری مجموعہ’’ جوڳی پہلے منتر سمجھے‘‘دے پنج ایڈیشن چھپ چکے ہن۔تے ایوں اخبارات اچ چھپݨ آلے اہم ادبی شخصیات دے انٹر ویوز جیڑھے صابرؔ عطاء نے کیتے ہَن انہاں تے مشتمل کتاب ’’ملاقاتیں اور باتیں ‘‘ وی شائع تھی ڳئی ہے۔صابرؔ عطاء اپݨیاں ادبی تے صحافتی خدمات دے اعتراف اچ درجناں ایوارڈز وی حاصل کر چکے ہن۔آپ ادبی ، ثقافتی تے سماجی تنظیم’’سانول سنگت‘‘ لیہ یونٹ دے صدر ہن، جیندے زیرِ اہتمام اوہ تھل دی دھرتی تے بے شمار تقریبات کرا چکے ہن۔اڄکل لیہ وچ روز نامہ ایکس پریس تے روزنامہ خبریں واسطے اپݨے فرائض سر انجام ݙیندے پئین۔جتھوں تک صابرؔ صاحب دی شاعری دا تعلق ہے تاں آپ خوبصورت ، معیاری تے شعری پیمانیاں تے پوری اُترݨ آلی رواں شاعری کریندن۔ نمونہ کلام۔

(1)غزل

سچے دور اچ کوڑ کہانی کیویں لکھاں

آپ ݙسا میں خون کوں پاݨی کیویں لکھاں

پڑھݨ والا الف کوں پڑھݨ چاہندا نئیں

الف توں گھن کے میں یے تاݨی کیویں لکھاں

جیندی سوچ توں اپݨاں دل ہی باغی ہووے

اوندی سوچ کوں سوچ سیاݨی کیویں لکھاں

جیڑھا دل وچ غرضاں رکھ تے ملدا ہے سئیں

اوکوں سچا دلبر ہاݨی کیویں لکھاں

اکھیاں والا جیکوں سورج مکھی آکھے

صابرؔ سئیں میں رات دی راݨی کیویں لکھاں

(2)غزل

میں بھانویں جو بھنور وچ ہاں کنارے نال رکھدا ہاں

تیݙی یاداں تے خواباں دے سہارے نال رکھدا ہاں

ضرورت وچ کݙی کہیں دا خدا محتاج نئیں کیتا

منافے دے سفر دیوچ خسارے نال رکھدا ہاں

تیݙے غم دی تلاوت تاں میݙے  دل دا وظیفہ ہے

تیݙی یاداں دے ہر ویلے سپارے نال رکھدا ہاں

میکوں دنیا دا کوئی وی نظارا راس نئیں آندا

میں اپݨے دل دی دنیا دے نظارے نال رکھدا ہاں

میکوں مرشد ݙسایا ہاجڳارے قیمتی ہوندن

اُسے ݙینہ توں میں اڄ تائیں جڳارے نال رکھدا ہاں

٭٭٭