صائم سیف
صائم سیف سرائیکی زبان دا ہک شاعر ہے۔
نمونہ کلام
[لکھو | ماخذ وچ تبدیلی کرو]کیندی ونگ ہاں
کیندے سنگ ہاں..؟
ݙیکھ لکیراں
کیندی منگ ہاں..
کیندو تاڑاں
کیندا انگ ہاں
آپ دو ݙیکهاں
کیندا رنگ ہاں
پیار کراں میں..؟
جوگ دی جنگ ہاں
مونجھ دی ٻانہی
ہجر دی منگ ہاں
آپ ہاں مٹهڑی
ݙهاݙهی تنگ ہاں
میں صائم ہاں
رول ملنگ ہاں
صائم سیف
غزل
[لکھو | ماخذ وچ تبدیلی کرو]ساوَݨ،چُنری، شال دی رُت اے
سَڄڑیں سانگ وصال دی رُت اے
تیݙی مونجھ دے پاروں رونواں
لوک آدھن، پَݨیال دی رُت اے
جیوݨ کیتے ساہ رکھ چُھوڑوں
اَگوں آوسی کال دی رُت اے
دَھݨ ، دَھݨوال ، پندھیڑو آ گن
تُوں وی ول آ حال دی رُت اے
آڑی سِینگی حال رَلاؤں ہا
[لکھو | ماخذ وچ تبدیلی کرو]آڑی سِینگی حال رَلاؤں ہا
گُُزرےسارےسال وَلاؤں ہا
گھر دے پِچُّھو ڄَمُّوں تلے
ہک ٻئےدیاں گُݙیاں پَرناؤں ہا
تھال وَڄاؤں ہا اَٹے آلے
تاڑیاں ماروں جھمراں پَاؤں ہا
کُھو تو چیکی مٹی پٹ تے
گݙیں دے گھر بار ٻَݨاؤں ہا
چاچے ُشیدو دی ہَٹی توں
چاول گِھیئوتے گُڑ گِھن آؤں ہا
چاڑھ تے چاول گڑ آلے ول
سارے بہہ تے رلے کَھاؤں ہا
ہک ٻئےدو ول کٹھیاں تھی کے
گُݙیں دا وَل ݙَاج ہُکاؤں ہا
تتی وانہ لگے شالا
نظر دا کالا ٹکا لَاؤں ہا
کھیݙاں کِھیݙدیں ڄَمُّوں تلے
ہاڑ پہاڑ دا ݙینہہ لَہاؤں ہا
ہئے او ویلھا کتھاں لَݙ گئے
سَݙ ماروں اُوکوں سَݙواؤں ہا
ہُݨ تاں دِلڑی وَݙی تھی گئی
آ دِلڑی دے حال وَنݙاؤں ہا
عیدتےاوندی آمد تھیسی
ونگّاں پا چُنی ٹَھمکاؤں ہا
میݙا یار وی آندا پیا ہے
ڄُل ٹُوبھے تے پُھوت ٻَݨاؤں ہا
رنگ کالا تاں بَھاندا ہِیسی
ڄل ڑی کالا سوٹ سِیواؤں ہا
گُݙی کوں ݙیکھݨ آندے پن
ڄل کوٹھے کوں پُولا ݙِیوؤں ہا
شَہر بَزار دو پھیرا پا تے
ݙاڄ گُݙیں دا ول گِھن آؤں ہا
آ ڑی سینگی حال رلاؤں ہا
ہک بئے دیاں دِھیریں پَرناؤں ہا
اللہ خیر کریسی
[لکھو | ماخذ وچ تبدیلی کرو]کُھوہ گِڑدے کُھوہ واہندے رہسن اللہ خیر کریسی
چھِیڑو سارے .......گاندے رہسن اللہ خیر کریسی
ڄَالیں دے لَڑ پِیلھوں ہُوسن ٹُوبھے تار وِٹیسن
کونجیں دے جُھنڈ لہندے رہسن اللہ خیر کریسی
جَگ جُھمر نال کھلدا رہسی اَنت ݙیہاڑے توݨیں
دولی دول....... وڄیندے رہسن اللہ خیر کریسی
ماء دھرتی دے پیٹوں ہر دم چاہت ڄَمدی رَہسی
خون سجیلے........ ݙیندے رہسن اللہ خیر کریسی
پِپُّل والے تھلے اُتے.............. قصہ چھڑدا رہسی
گبھرو گِسڑݨی ٻہندے رہسن اللہ خیر کریسی
ہَالی روز سویلے اونویں ݙَانداں رَلے ویسی
کُکڑ بانگاں ...... ڈیندے رہسن اللہ خیر کریسی
غزل
[لکھو | ماخذ وچ تبدیلی کرو]تیکوں پوجاں، تے وار تھیواں
تیݙی خدمت گزار تھیواں
پیار پالاں تے پیار ستراں
جیکر مکراں، مزار تھیواں
اینجهی مینڈهی گندهیج پووے
تیݙی بنری شمار تھیواں
تیݙے اندر دا شوق ہوواں
تیݙے چولے دا ہار تھیواں
تیݙی اکھ، مہربان تهیوے
میں وی کِڄڑی، کنوار تهیواں
نال تیݙے بہار ماݨاں
ٻاجھ تیݙے خوار تھیواں
تیݙی فرقت دا جوگ چا تے
روز دردیں سوار تھیواں
تیݙے ملݨ دے سانگ صائم
تیݙے در تے، قطار تهیواں
صائم سیف