صائمہ سلیم

صائمہ سلیم
صائمہ سلیم
معلومات شخصیت
تاریخ پیدائش	1987ء،
قومیت	پاکستان
عارضہ	اندھا پن
عملی حیاتی
تعليم	ایم فل (انگریزی ادب)
مادر علمی	کنیئرڈ کالج برائے خواتین، جارج ٹاؤن یونیورسٹی
پیشہ	سفارتی خدمات سرکاری ملازم، سفیر
کارہائے نمایاں	جنیوا وِچ انسانی حقوق دی سیکرٹری

صائمہ سلیم پاکستان دی پہلی نابینا سفارتکار ہِن۔ اوہ پاکستان دی اُن پہلی نابینا افراد وِچ شامل ہِن جنّھاں کوں سفارتی خدمات انجام ݙیوݨ دا موقع میسر آ ڳیا ہِے۔ اوہ جنیوا وِچ اقوام متحدہ وِچ پاکستان دے مستقل مشن کِیتے انسانی حقوق دی ݙوجھی سیکرٹری ہِن۔

مختصر تعارف

صائمہ سلیم 1987ء وِچ پیدا تھئیں۔ انگریزی ادب وِچ ایم اے، ایم فل دی ڈگری گِھنݨ دے بعد اوہ پاکستان دی پہلی سی ایس ایس نابینا لڑکی قرار پائیں۔ انّھاں نے سی ایس ایس دے امتحان وِچ چھٹی پوزیشن حاصل کِیتی ہئی۔ 2008ء وِچ انّھاں کوں وزیر اعلیٰ پنجاب میاں شہباز شریف نے معذور افراد دے عالمی ݙینہہ دے موقع تے منعقدہ ہک تقریب وِچ اپݨا معاون خصوصی مقرر کرݨ دا حکم جاری کر ݙِتّا۔ تے پھر جلدی ہی 2009ء وِچ اوہ 32 سال دی عمر وِچ وزارت خارجہ وِچ خدمات سر انجام ݙیوݨ لڳیں۔ صائمہ سلیم ملک دی پہلی نابینا سفارتکار ہِن جیڑھیاں 2013ء توں جنیوا وِچ اقوام متحدہ وِچ پاکستان دے مستقل مشن وِچ کم کریندی پئیں ہِن۔ اوہ انسانی حقوق نال تعلق رکھݨ والی ݙوجھی سیکرٹری دے عہدے تے فائز ہِن۔ تے معذوری انّھاں دے سرکاری فرائض دی ادائیگی وِچ کݙاہیں حائل کائے نہ تھئی۔

تعلیم

صائمہ سلیم نے اپݨی ابتدائی تعلیم، نابینا افراد دے اسکول عزیز جہاں بیگم ٹرسٹ توں حاصل کِیتی۔ انّھاں نے کنیئرڈ کالج برائے خواتین یونیورسٹی توں انگریزی ادب وِچ بی اے تے ایم فل دی ڈگری مکمل کِیتی، جِتھاں انّھاں نے فرسٹ ڈویژن دے نال اپݨی ݙوہیں ڈگریاں مکمل کِیتیاں تے اپݨی عمدہ کارکردگی دی وجہ نال طلائی تمغہ جِتیا۔

اوہ 300 نابینا طلبہ وِچ سرفہرست 10 طلبہ وِچ شامل ہَن۔

2007ء وِچ، انّھاں نے اپݨا سینٹرل سپیریئر سروس (سی ایس ایس) دا امتحان پاس کِیتا جِتھاں اوہ مجموعی طور تے چھٹی پوزیشن تے زنانیاں وِچ پہلی پوزیشن حاصل کرݨ وِچ کامیاب رہیاں۔

انّھاں نے جارج ٹاؤن یونیورسٹی، غیر ملکی خدمات دے اسکول وِچ تعلیم حاصل کرݨ کِیتے فل برائٹ اسکالرشپ حاصل کِیتی۔

ذاتی حیاتی

بچپن وِچ، صائمہ سلیم کوں آر پی ریٹینائٹس پگمنٹوسا دی تشخیص تھئی۔ ایہ ہک آنکھ دی بیماری ہِے جیڑھی کہیں شخص دی بصارت کوں متاثر کریندی ہِے۔ ایہ بیماری لاعلاج ہئی تے آہستہ آہستہ، صائمہ سلیم نے اپݨی نظر کھوݨا شروع کر ݙِتی۔ جݙاں اوہ ترئے سال دی ہَن، صائمہ سلیم نے اپݨی نظر پوری طرح کھو ݙِتی۔ صائمہ سلیم دے چار بھیݨ بھرا ہِن، انّھاں وِچوں ݙو نابینا ہِن۔ اِیں توں پہلے، انّھاں دے ہک بھائی، یوسف سلیم پاکستان دے پہلے نابینا جج دا اعزاز رکھیندے ہِن۔ صائمہ سلیم دی ہک بھیݨ، جو نابینا ہِن، لاہور یونیورسٹی وِچ لیکچرار ہِن۔

کَم کار آلی حیاتی

صائمہ سلیم نے اپݨے کیریئر دا آغاز اپݨی ہوم یونیورسٹی، کنیئرڈ کالج فار ویمن وِچ بطور لیکچرر کِیتا ہئی۔ جِتھاں اوہ 2007ء توں 2008ء تئیں پڑھاندی رہی ہَن۔