شیخ عبداللہ ملتانی

1090ھ۔1679ء

شیخ عبداللہ ملتانی ‘ ملتان دے ہک بزرگ درویش گزرین۔ آپ دی ہک طویل نظم ’’پردیسی جندڑی‘‘کوں وݙی شہرت تے مقبولیت نصیب تھئی۔ ’’پردیسی جندڑی ‘‘صدیاں توں سرائیکی علاقے دے دینی مدارس تے گھراں وچ پڑھیندی پئی اے۔ بزرگ اینکوں وظیفے دے طور تے ہر روز تلاوت دے بعد پڑھدن۔ ایں نظم دا موضوع دل دی صفائی ‘ چنگے عمل ‘ دنیاوی بے ثباتی ‘ ظلم توں نفرت ‘ جھوٹی عزت و ناموس دی مذمت تے صالح اعمال دے انعامات ہن۔ نظم دی زبان رواں تے سلیس ہے۔ نظم پڑھ تے شیخ عبداللہ ملتانی دی شاعرانہ وݙائی دا یقین تھیندے۔ اے نظم سی حرفی دے وچ ایندی ہیت مخمس ہے۔ نمونہ کلام:

س  سدا نہیں باغ بغیچے

سدا نہ ہوندے فرش غلیچے

      ہر دم فکر  چلݨ  دا کیجے

اوڑک موت لُٹیسیا

سمجھ بندے توں نال فکر دے اے جندڑی پردیسیا

ص صفائی رکھ وچ سینے

چھڈ دنیا دے سارے کینے

  ٻاجھ صفائی کل نابینے

سچا عمل تریسیا

  سمجھ بندے توں نال فکر دے اے جندڑی پردیسیا

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان