شیخ ابراہیم فرید ثانی
(864ھ توں983ھ؍1459ء توں1575ء)
حضرت شیخ فرید ثانی وی سلسلہ چشتیہ دے ہک منے ہوئے بزرگ گزرن ۔ آپ حضرت بابا فرید الدین گنج شکرؒ دی ٻارھویں گدی نشین ہن۔ آپ ٻہوں عبادت گزار ‘ نیک تے اللہ دے رتے درویش ہن۔ لوک عقیدت نال آپ کوں فرید ثانی آہدے ہن۔ ہِیں وجہ توں ٻہوں سارے لوک مغالطے نال آپ دے کلام کوں بابا فرید دا کلام سمجھندے رہن۔ آپ گرونانک دے ہمعصر دے سنگتی ہن۔ ݙوہاں دے آپس وچ جوابی سوالی منظوم مکالمے وی ملدن۔ آپ دیاں کجھ کافیاں تے103شلوک بابا گرونانک دے گرنتھ وچ شامل ہن۔ ایندے علاوہ ہک نصیحت نامہ وی ملدے (51)۔شیخ ابراہیم فرید ثانی دی زبان سادہ ‘ ہندوی‘ فارسی آمیز سرائیکی ہے ۔ حیات‘ صوفیاء دے نزدیک وصال دی راہ وچ ہک کندھ ہے ‘ تے موت من بھانونی شئے جو نکھڑی روح کوں محبوب نال ملیندی ہے۔ ہِیں کیتے صوفی ہمیشہ حیاتی توں اَختے ہوندن ۔ فرید ثانی دا بیت ہے۔
ٻڈھا ہویا شیخ فرید کنبݨ لڳی دیہہ
جے سو ورہیاں جیوݨا بھی تیں ہونا کہیہ
آپ دنیا داری تے دنیاوی سکھ کوں وقتی وندلاوا سمجھدن۔ اے آسانیاں انسان کوں صحیح دھگ توں بہکا ݙیندن۔ قناعت صبر تے نفسانی خواہشاں دی نفی درویشاں دے روح دی غذا ہوندی ہے۔
فریدا روٹی میݙی کاٹھ دی لاوݨ میݙی بکھ
جنھاں کھادیاں چوپڑیاں سوا وسہسن ݙکھ
زندے دے مناقانہ رویے تے فرید ثانی چوٹ کریندیں ہوئیں اَہدن:
فریدا کندھ مصلی ‘ صوف ڳل ‘ دل کاتی ‘ گڑبات
ٻاہر ݙسے چانݨا دل اندھاری رات
حوالہ
[لکھو | ماخذ وچ تبدیلی کرو]کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان