شہزادہ سیفل قیصراݨی

1950ء تا2017ء

شہزادہ سیفل قیصراݨی 8جولائی1950ء کوں ظفراللہ خان قیصراݨی (ذیلدار)) دے گھر پیدا تھئے ، میٹرک تک تعلیم حاصل کیتی ۔عملی زندگی دا آغاز بحیثیت سکول ٹیچر (سندھ کنوں) کیتا شاعری دے حوالے نال سرائیکی شاعری دیاں تمام صنفاں یعنی ݙوہڑہ،نظم ،کافی، غزل ، قطعہ وغیرہ خوب لکھدے ہَن۔انہاں دی مشہور نظم ’’غربت‘‘ دا ایہ شعر اڄ وی زبان زدِ عام ہے کہ۔

؎میں ایں ڳالھوں پیندی ہاں ݙَولیں کوں چک اے

اڄاں تیکوں میݙی محبت تے شک اے

شہزادہ سیفل دا شمار اپݨے زمانے دے سینئر شعرا وچ تھیندا ہا ،ہر وݙے مشاعرے وچ انہاں کوں مدعو کیتا ویندا ہا۔ سرائیکی وسیب تاں کیا اوہ کراچی تک مشاعرے پڑھدے ہن۔ جانبازؔ جتوئی تے سرورؔ کربلائی جھئیں اُساتذہ آپ دے شعری فن دے معترف ہَن۔ نمونہ کلام

(1)غزل

اے ہنجھوں دے موتی درِ اقدس توں عطاء تھئے

ہا شیشہ ئِ دل میلا مسائیں آن صفا تھئے

میں اپݨی اَنا والے نمہی خول توں نکھتا

توں چڑھدے ہوئے سجھ دا پجاری ہیں تاں کیا تھئے

ہا باغ دے اندر وی تاں مقتل دا نظارا

او پھَل تاں سرِ دار بٖہوں تلخ نوا تھئے

نہ چھیڑو میݙے یارو اے نغمات دے قصے

میں قید وچالے ہاں کئی اُݙراک بٖیا تھئے

میں فکر دی سولی تے رکھین ہوش سلامت

کیوں سیجھ سُتّا ڈھول تیݙے ہوش ہوا تھئے

سیفلؔ چا تھݙیندی ہے اوکوں آ کے اندھاری

بٖس سرو دے وانگوں وی جہڑا درخت وݙا تھئے

(2)غزل

اساݙیاں دیہاتاں نگر ڈھوٹھی ویندن

اے روزی دے چنتے چکر ڈھوٹھی ویندن

ساݙی کار شاید اے ہن بکھ دے بٖیلے

مکوڑے وی داݨے کوں گھر ڈھوٹھی ویندن

میکوں رستہ ابلیس دا صاف ݙسدے

برائیاں تاں جن و بشر ڈھوٹھی ویندن

جڳارے ، کھپارے ، ونڈارے اساݙے

ساݙے ذہن فاقے فقر ڈھوٹھی ویندن

اساں آپ اپݨے جو قاتل ہیں سیفلؔ

اے سوچاں دے خونی بھنور ڈھوٹھی ویندن

٭٭٭