شوکت علی شائق

شوکت علی شائق 30نومبر 1965ء کوں امام بخش خان گرمانی دے گھر کروڑ لعل عیسن ضلع لیہ وچ پیدا تھئے ، ایف اے تک تعلیم حاصل کیتی ۔زمیندارہ کریندے ہَن ۔ شاعری دے حوالے نال آپ خوبصورت لب و لہجے دی رواں شاعری کریندے ہَن سُݨیا ہے جو آپ دی ہک کتاب وی حُسینیت دے موضوع تے آپ دی وفات دے بعد چھپ چکی ہے ۔ غزل دا نمونہ پیشِ خدمت ہے۔

(غزل)

ونگیں توں ہتھ ڈھول صفا ہن خیر تاں ہے

پیر اُٻاہلے پُٹھے راہ ہن خیر تاں ہے

اڳاں پچھاں کھڑ کے تکّیں ہاؤ رو ہاؤ رو

چوریں وانگوں رکدے ساہ ہن خیر تاں ہے

گھلکا  بوچھݨ ، پُٹھے پانچے ، میلے کپڑے

کن تیاریاں ، چیتے جاہ ہن ! خیر تاں ہے

نہ تھی مونجھا کہیں کن نہ پُچھ آ میں ݙسّاں

غیر دے گھر دے اِنوں راہ ہن خیر تاں ہے

تھوݙیں روّیاں ، پھکّیاں شکلاں ، ٻُسّے درشن

میں بھلداں یا عشق دے پھاہ ہن خیر تاں ہے

نہ پھِر اڄ توں ڳلیاں دے وچ کملیں وانگوں

ہوش تیݙے اڄ ڈھول بے جاہ ہن خیر تاں ہے

٭٭٭