شفقتاں تے محبتاں

میݙے ابا سئیں مدرس ہن ،میݙی سنبھل واݨ توں پہلے ٻال میݙے ابے سئیں کول پڑھدے ہن ، ابے سئیں دے شاگرد میکوں کھݙیندے ہن ،چئی ودے راہندے ہن جیرھے ڈھیر پیار کریندے ہن ،اُنہاں وچوں ہک ناں محمد اسماعیل جو کہ اَڄ ٻہوں وݙے عالم دین ہن ،اساݙے علاقے وچ انہاں دا ٻہو ں وݙا ناں ہے ،پنجابی الاوݨ آلی آرائیں برادری نال تعلق رکھدن ،ابے سئیں دے پیارے شاگرد یں وچوں ہن ،نِکے لا ٻہوں پیار کریندے ہن ایویں بشیر خان جمالی، نور محمد پنوار ،اللہ بخش دھریجہ تے ٻے ڈھیر سارے شاگرد ہوندے ہن جہڑے میکوں مونڈھے تے چئی ودے راہندے ہن۔ ہٹی توں شئے گھن ݙیندے ہن تے پیار کریندے ہن ، پنج چھ سال دی عمر ہوسے جو میکوں ملتانی قاعدہ شروع کرایا ڳیا ۔

حوالہ

کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان