شریف شاذب

اصل ناں      محمد شریف

قلمی ناں       شریف شاذب  

جمن           1962ء  

تعلیم          مڈل

پیشہ           ٹیلر ماسٹر 

فون نمبر       03343176404

جاہ پتہ        ارم ٹیلر ،گلی سردار شاہ مین بازار لودھراں

شاعری انسان دے اندر دے جذبات دے اظہار دا ناں ہے تے انسانی جذبات کئی طرح دے ہوندن،پیار محبت دے جذبات تے کاوڑ غصّے دے جذبات۔مگر کاوڑ غصّے دے جذبات کئی واری صبر دی حد پار کر ویندن۔ایں حوالے نال کوئی وی باشعور شاعر صبر و تحمل دا دامن ہتھوں نہیں چھوڑیندا ۔شریف شاذب اوہ صلح پسند تے حوصلہ مند شاعر ہے جیڑھا ڈوجھیاں کوںوی صبر و تحمل دی تلقین کریندے تے اخلاق دے دائرے دے اندر رہن دا درس ڈیندے تے آہدے۔

کجھ ادب لکھن دے سئیں آداب ہن ، دستور ہن

دائرہ اخلاق دی حد کوں نہ اصلوں پار کر

(1)غزل

نہ بشر کوں بغض ٹھہندے،نہ حقارت ٹھیک ہے

رنگ سارے سوہنے رنگ اِن جے بصارت ٹھیک ہے

جتھاں ڈورے حاکماں دی حکمرانی تھی ونجے

اتھ اشارے نال بولن دی مہارت ٹھیک ہے

رستہ مَل کے دلربا کوں نت ستاون ٹھیک نئیں

جے اچانک تھی ونجے تاں او زیارت ٹھیک ہے

جان اوئیں ہے امانت کیوں نہ سودا کر گھنوں

سر دے بدلے دین بچے او تجارت ٹھیک ہے

کُل مسیتاں دی ہے عظمت میڈے سر اکھیں تے پر

جتھاں تیڈا ذکر تھیوے او عمارت ٹھیک ہے

جسم دھوون دا وی شاذبؔ ہے عمل سوہناں مگر

دل کوں جیکر دھو گھنیجے او   طہارت ٹھیک ہے