شردھا کپور

شردھا کپور
(انگریزی: Shraddha Kapoor)، (ہندی : श्रद्धा कपूर)
شردھا، 2014ء وچ
معلومات شخصیت
ڄمݨ	3 مارچ 1987 ممبئی, مہاراشٹر,بھارت
قومیت	بھارتی
اکھیں دا رنگ	بھورا
والیں دارنگ	سیاہ
قد	1.65 میٹر
وزن	52 کلو گرام
مذہب	ہندومت
پیو	شکتی کپور
ماء	شیوانگی کولاپوری
بھیݨ بھرا	سدھانت کپور
عملی زندگی
مادر علمی	جامعہ بوسٹن جمنابائی نرس اسکول
پیشہ	اداکارہ گلو کار
دور فعالیت	2010ء تا حال
نامزدگیاں
زی سائن اعزاز برائے بہترین معاون کردار – اداکارہ (2014)
دستخط
	IMDB پر صفحہ

شردھا کپو ہک بھارتی اداکارہ تے گلوکارہ ہن، جیہڑی ہندی فلماں وچ کم کریندیاں ہن۔ اوہ ہندی فلماں وچ ولن تے مزاحیہ کردار ادا کرݨ والے اداکار شکتی کپور دی دھی ہن۔ انہاں نے اپݨے فنی سفر دا آغاز فلم تین پتی (2010ء) وچ ہک معمولی کردار نال کیتا۔ 2011ء وچ فلم لو کا دا اینڈ نال انہاں نے مرکزی اداکارہ دے طور تے اپݨے فنی سفر دا باقاعدہ آغاز کیتا۔

پس منظر تے ذاتی زندگی

شردھا کپور دی پیدائش تے پرورش ممبئی وچ تھئی۔ اوہ اپݨے پیو دی طرفوں پنجابی نژاد ہن تے ماء دی طرفوں مراٹھی تے کونکانی نسل نال تعلق رکھیندیاں ہن۔ انہاں دی ماء دے ݙاݙا پنڈھری ناتھ کولہا پورے (دینی ناتھ منگیشکر دے بھتریجے) دا تعلق کولہا پور نال ہئی تے انہاں دے مامیں دا تعلق پانجی، گوا نال ہئی۔ ہندوستان ٹائمز کوں ݙتے ڳئے ہک انٹرویو وچ شردھا کپور نے انکشاف کیتا جو انہاں دی پرورش مراٹھی زنانی دی حیثیت نال تھئی ہے کیوں جو انہاں دے مامیں مہاراشٹرا وچ رہندے ہن۔ انہاں نے آکھیا جو اوہ بچپن وچ ہی ادبی تربیت توں گذریاں ہن۔ شردھا کپور دے ٹٻر دے ارکان وچ انہاں دے پیو شکتی کپور تے ماں شیونگی کپور، انہاں دے وݙے بھرا سدھانتھ کپور تے انہاں دیاں ݙو ماسیاں پدمنی کولہا پوری تے تیجاس ونی کولہاپوری سبھے ہندوستانی سینما وچ اداکار ہن۔ اوہ لتا منگیشکر، آشا بھوسلے، مینا کھڈیکر، اوشا منگیشکر تے ہری ناتھ منگیشکر دیاں بھتریجیاں ہن۔ اداکاریں دے ٹٻر نال تعلق رکھݨ دی وجہ توں انہاں کوں نکی عمر توں ہی اداکارہ بݨݨ دا شوق ہئی۔ اپݨے ماء پیو دے کپڑے پا کے اوہ فلمی مکالماں دی مشق کریندی ہن تے شیشے دے سامݨے بالی ووڈ دے گاݨے تے رقص کریندی ہن۔ اوہ اپݨے پیو دے نال بچپن وچ شوٹنگ دے مختلف مقامات تے وی ڳئیاں۔ ڈیوڈ دھون دی ہک شوٹنگ دے دوران انہاں نے اداکار ورون دھون دے نال دوستی کیتی۔

فلمی کیریئر

شردھا نے فلم عاشقی 2 (2013ء) وچ ہک گلوکارہ دا کردار ادا کیتا۔ ایں کردار توں انہاں نے کافی مقبولیت حاصل کیتی۔ ایں فلم کیتے انہاں نے فلم فیئر اعزاز برائے بہترین اداکارہ جتیا۔ اڳلے سال اوہ وشال بھردواج دی فلم حیدر وچ شاہد کپور دے نال نظر آئیاں۔ شردھا نے رومانوی فلم اک ولن (2014ء)، ڈانس ڈرامائی فلم اے بی سی ڈی 2 (2015ء) تے ہنگامہ خیز فلم باغی (2016ء) توں کافی مقبولیت حاصل کیتی۔ ایہ فلماں تجارتی طور تے کامیاب تھیاں۔ کجھ تجارتی طور تے ناکام فلماں دے بعد اوہ مزاحیہ ڈراونی فلم ستری (2018ء) وچ نظر آئیاں۔ ایہ فلم انہاں دے فنی سفر دی تجارتی طور تے سب توں زیادہ کامیاب فلم ہئی۔

ٻئے کم

فلماں وچ اداکاری دے علاوہ، شردھا نے اپݨیاں فلماں کیتے گاݨے وی ڳائے ہن۔ اوہ کئی برانڈز تے پروڈکٹس کیتے ترجمان (برانڈ ایمبیسیڈر) وی بݨیاں ہن۔ 2015ء وچ انہاں نے اپݨی ذاتی فیشن لائن دا آغاز کیتا۔ اوہ اسٹیج شوز، کنسرٹس تے تقریبات وچ وی حصہ ڳھندی ہن۔ شردھا دا شمار بھارت دی انتہائی خوبرو تے ممتاز شخصیات دی تندیر وچ تھیندے۔

فلماں وچ کم کرݨ دے علاوہ شردھا نے کئی نجی تنظیماں کوں وی سپورٹ کیتے۔ انہاں نے کئی اسٹیج شوز وی کیتے تے اپݨیاں فلماں کیتے کئی ڳاݨے وی ڳائے ہن۔ انہاں نے لیکمے فیشن ویک وچ کئی ڈیزائنرز کیتے والک (walk) وی کیتی تے کئی میگزین کیتے کور ماڈل وی بݨیاں ہن۔ شردھا کئی لیکمے کاسمیٹکس، ویٹ، لپٹن سمیت کئی ٻئے پروڈکٹس کیتے ترجمان (برانڈ ایمبیسیڈر) وی رہیاں ہن۔ بالی ووڈ ہنگامہ نے انہاں کوں اشتہارات صنعت دی سب توں زیادہ مطلوب اداکاراں وچوں ہک آکھیا ہے۔ 2015ء وچ انہاں نے ایمیزون دی مدد نال اپݨی فیشن لائن متعارف کروائی۔