شردھا سری ناتھ

شردھا سری ناتھ
معلومات شخصیت
ڄمݨ	29 ستمبر 1990ء (35 سال)  بنگلور
رہائش	بنگلور
شہریت	بھارت
عملی زندگی
پیشہ	ادکارہ ،  فلم اداکارہ
	IMDB پر صفحہ

شردھا سری ناتھ ہک بھارتی فلمی اداکارہ ہن جیہڑی خاص طور تے کنڑ تے تامل فلموں وچ نظر آندیاں ہن۔ اوہ کئی واری تیلگو، ہندی تے ملیالم فلموں وچ وی نظر آ چکیاں ہن۔ شردھا نے کنڑ زبان دی نفسیاتی رومانچک فلم یو ٹرن (2016) وچ اپݨے کردار کیتے وسیع تعریف حاصل کیتی، جیندے کیتے انہاں نے بہترین اداکارہ دا فلم فیئر ایوارڈ وی جتیا۔ ایندے علاوہ، فلم جرسی، اروی، وکرم ویدھا، نیرکونڈا پروائی تے آپریشن المیلاما وچ انہاں دی پرفارمنس کوں وی سراہیا ڳیا تے مؤخر الذکر کیتے انہاں نے بہترین اداکارہ (نقاد) - کناڈا دا فلم فیئر ایوارڈ جتیا۔

ابتدائی زندگی تے تعلیم

شردھا جموں و کشمیر دے قصبہ ادھم پور شہر دے کمانڈ اسپتال وچ پیدا تھئیاں۔ انہاں دے پیو ہندوستانی فوج دے کومون رجمنٹ وچ افسر ہن تے ماء سکول دی استانی ہئی۔ پیو دے ٹرانسفر دی وجہ توں اوہ بھارت دے کئی شہریں وچ رہائش پزیر رہیاں، جنہاں وچ سورت گڑھ (راجستھان)، بھوپال (مدھیہ پردیش)، دھروچولا (اتراھنڈ)، بیلگام (کرناٹک)، سلچر (آسام) تے سکندرآباد (تلنگانہ) شامل ہن۔ سکندرآباد وچ آرمی سکول آر کے پورم توں ٻارہویں تک تعلیم حاصل کرݨ دے بعد، اوہ بنگلور منتقل تھی ڳئیاں تے لیگل سٹڈیز کیتے بنگلور انسٹی ٹیوٹ وچ قانون دی تعلیم حاصل کیتی۔

کیریئر

لا سکول توں فارغ التحصیل تھیوݨ دے بعد، اوہ بنگلور وچ قائم رئیل اسٹیٹ کمپنی دے نال رئیل اسٹیٹ وکیل دے طور تے کم کرݨ لڳیاں تے بعد وچ ہک فرانسیسی خوردہ کمپنی وچ رئیل اسٹیٹ دے قانونی مشیر دے طور تے کم کیتا۔ اپݨی کل وقتی کارپوریٹ ملازمت دے نال نال، اوہ ڈرامیاں وچ وی اداکاری کریندی رہیاں تے متعدد اشتہارات وچ وی نظر آئیاں۔ ستمبر 2015ء وچ ریلیز تھیوݨ آلی فلم کوہ نور وچ انہاں کوں ݙوجھی زنانی لیڈ دا کردار ݙتا ڳیا۔ انہاں دی کنڑ زبان دی پہلی فلم یو ٹرن مئی 2016ء وچ ریلیز تھئی، جیندی ہدایتکاری پون کمار نے کیتی ہئی۔ ایہ فلم نیو یارک انڈین فلم فیسٹیول وچ پریمیئر تھئی تے بعد وچ ہندوستان تے دنیا بھر وچ ریلیز تھئی۔ شردھا کوں ایں فلم کیتے ناقدین دی پزیرائی ملی تے انہاں کوں بہترین اداکارہ دے طور تے کناڈا دے فلم فیئر ایوارڈ کیتے نامزد کیتا ڳیا۔

2017ء وچ انہاں دی ریلیز تھیوݨ آلیاں فلماں اروی تے آپریشن المیلاما ہن۔ انہاں نے منی رتنم دی فلم کاترو ویلیدائی وچ ہک نکا کردار ادا کرکے تامل انڈسٹری وچ وی قدم رکھیا۔ بعد وچ انہاں نے آر کنن دی فلم آئیون تھانتھیرن وچ گوتم کارتک تے آر جے بالاجی دے مدمقابل مرکزی کردار ادا کیتا۔ انہاں نے پشکر گایتری دی فلم وکرم ویدھا وچ مرکزی ہیروئین دا کردار ادا کیتا، جیندے وچ انہاں دے مدمقابل آر مادھون تے وجے سیتوپتی ہن۔ ایندے بعد گوتم راما چندرن دی ہدایت کاری وچ فلم رچی وچ اوہ اداکار نیوین پاؤلی دے مدمقابل مرکزی کردار وچ نظر آئیاں۔

2019ء وچ، شردھا دی پہلی ریلیز میلان ٹاکیز ہئی، جیہڑی بالی ووڈ وچ انہاں دی پہلی فلم ہئی، جیندی ہدایتکاری تگمانشو دھولیا نے کیتی ہئی۔ ایندے بعد انہاں دی تیلگو فلم جرسی ریلیز تھئی، جیندے وچ اوہ اداکار نانی دے نال نظر آئیاں۔ ایں سال انہاں دی تامل فلم کے -13 وی ریلیز تھئی، جیندے وچ انہاں دا جوڑا ارولنتھی دے نال ہئی۔ ایندے بعد انہاں دی کنڑ فلم رستم ریلیز تھئی، جیندے وچ اوہ شیوا راجکمار دے نال نظر آئیاں۔

آوݨ آلے منصوبے

ستمبر 2019ء تک، شردھا کناڈا وچ نونسم ستیش دی فلم گودھرا تے رشب شیٹھی دی فلم ردراپریاگا وچ کم کر یندیاں پیا ہن۔ تامل وچ اوہ وشال دے نال فلم چکرا تے مادون دے نال ہک فلم وچ کم کریندی پئی ہن۔