شبیر ابن بے رنگ دی کتاب

شبیر ابن بے رنگ دی کتاب آئی اے، کتاب تے تبصرے دی جاہ تے میں اے ݙسݨ چہنداں جو اپݨے ابے سئیں آنگے سرائیکی دی خذمت کریندیں کریندیں ایندی وی ݙاڑھی چِٹی تھی ڳی اے۔ جے اے سندھی یا پنجابی ہووِن ہا تاں انہاں کوں انعام تے سرکاری ملازمتاں ملن ہا، سرائیکی ہووݨ جرم اے،اساݙیاں کئی نسلاں غریبی کھا ڳئی اے، وسیب دے سارے لوک   سرائیکی دا لیکھا ایویں ہے جو ݙند ہن تاں چݨے کینھی تے چݨے ہن تاں ݙند کینھی۔ جنہاں کول پا پیسہ ہے انہائیں کوں سرائیکی دی اسیس کینھی تے جنہائیں کوں اسیس اے انہائیں کول پا پیسہ کینھی۔ اے مسئلے تے مجبوریاں نال نال اِن، پر اساں راہ دی ہر رکاوٹ کوں تھݙا مار تے اڳوں تے لنگھ ویسوں تے تے وطن وسیب دی قومی آزادی دے پندھ کوں کھوٹا نہ تھیوݨ ݙیسوں۔ احٖ میں کتاب بارے گھٹ تے جیرھی ہستی تے کتاب لکھی ڳئی اے، اوں بارے ڳال کریساں جو حضرت امام عالی شان دی شان بیان کرݨ حق سچ دی شان بیان کرݨ اے۔ میں جیرھی ڳال کرݨ چہنداں او اے ہے جو اساں حضرت امام حسین علیہ السلام دے قربانیں کوں یاد کروں ، انہاندی تقلید کروں، کوڑ نال ٹکرا ونڄوں ، بھاویں او پہاڑ ا ی کیوں نہ ہووے۔ ہر طرح دی فرقہ پرستی توں بچوں، فرقہ بندی دی سپورٹ کرݨ آلے ہر ہک دی مخالفت کروں ، بھاویں او ایران تے سعودی عرب دے حکمران ای کیوں نہ ہووِن، ہر طرح دی فرقہ واریت ، ضیعف الاعتقادی توں بچوں ، ٹھڳو پیر مکری ملاں تے ظلمی جاڳیردار توں بچوں تے اپݨے وسیب دے نینگریں تے طالبعلمیں کوں فرقہ پرستی دی ٻٹھی دا ٻل بݨاوݨ دی جاہ تے انہاں کوں تکڑا کروں، انہاں کوں اعلیٰ تعلیم ݙے تے یورپی سائنسدان توں ودھ عقلمند بݨائوں تے دنیا کوں ݙسوں جو اے کویلی مکوڑے نی انسان اِن، جے اساں اپݨے ٻالیں کوں اعلیٰ تعلیم نہ ݙیوائی تے فرقیں تے نفرتیں دے نصاب پڑھائی رکھیے تاں ول انگریزیں کوں مبارخ ہووے، سو سال تاں کیا کئی سو سال تئیں وی اساں انہاندا مقابلہ نی کر سڳدے۔

حوالہ

·        معروف سرائیکی دانشور سئیں ظہور دھریجہ دی کتاب سرائیکی قلم قبلیہ وچوں چوݨ