شباب بلوچ

اصل ناں       غلام یٰسین

قلمی ناں       شبابؔ بلوچ

جٖمنْ           1967ء

تعلیم          میٹرک

پیشہ            ملازمت

فون نمبر        0349 1855785

جاہ پتہ         موضع ملک پور تحصیل لیاقت پور ضلع رحیم یار خان

شباب بلوچ منفررد لبٖ و لہجے دا مایہ ناز شاعر ہے، جیندا ہر شعر معنویت تے شعریت نال بھر پور ہوندے۔شباب بنیادی طور تے غزل گو شاعر ہے ، چھوٹی بحر اچ خوبصورت غزل لکھدے۔شعری مجموعہ ’’ سرت‘‘ دے خالق شباب بلوچ شاعر ہونْ دے نال نال ہک محقق تے مؤرخ وی ہے۔جئیں صرف اپنْے چانڈیہ قبیلے دی تاریخ ’’ مشاہیر چانڈیہ‘‘لکھ کے ہک قوم پرست محب تے مؤرخ دا ثبوت ڈٖتے۔بقول شباب بلوچ ایہ کتاب کمپوز تھی چکی ہے۔اُنوں ڈیرہ غازی خان دے شاعر تے لکھاری الطاف جابرؔ (چانڈیہ) وی صرف چانڈیہ بلوچ قبیلے دی تاریخ لکھ کے مکمل کر چکے ہن ۔ہُنْ ڈٖیکھاں کتاب منظرِ عام تے پہلے کون گھن آندے ۔؟ بہر حال ہُنْ شباب بلوچ دا نمونہ کلام ملاحظہ فرماؤ!

(1)غزل

جے خود کوں ماکھی بنْائی ودا ہاں

تاں گھُنْ وی سینے کوں لئی ودا ہاں

لکھیندا بٖیٹھا ہے عیب میڈٖے

میں جیکوں مونڈھے تے چئی ودا ہاں

میں کیا شئے تیکوں سنبھال ڈٖیواں

میں اپنْی کیا شئے بچئی ودا ہاں

جتھاں کہ توں لوک جھُم اُتھاہیں

میں جتھ ودا ہاں اجئی ودا ہاں

میں حفظ تیکوں تاں کر گھدا ہے

مگر میں خود کوں بھلئی ودا ہاں

شبابؔ ہونکوں ودا گٖولینداں

میں جیکوں اندر لکئی ودا ہاں