شاہ پور

ضلع سرگودھا دا شہر تے تحصیل ،سرگودھا شہر توں دریائے جہلم دے کنارے خوشاب ونجٖݨ آلی سڑک توں 30کلو میٹر دے فاصلے تے واقع ہے۔اے لاہور توں ڈیرہ اسماعیل خان ونجٖݨ آلا قدیم رستہ ہے ۔دریائے جہلم کوں ریلوے پُل دے ذریعے عبور کیتا ویندے۔ اے پُل ضلع سرگودھا دے انگریز ڈپٹی کمشنر ڈی مونٹ مورنسی دے ناں توں منسوب ہے۔ ایندی لمبائی 2358فٹ ہے تے ٹریفک کیتے 1931ء اچ کھولیا ڳیا ہا۔ شاہ پور دے بارے روایت بیان کیتی ویندی اے جو ایندا پُراݨا ناں رام پور ہا تے اتھاں سترہویں صدی عیسوی تک ہندوئواں دی اکثریت ہئی۔ ایندا ناں دہلی توں آنوݨ آنے صوفی بزرگ شاہ شمس شیرازی دی وجہ نال تبدیل تھی تے شاہ پور تھیا۔شاہ شمس شیرازی امام جعفر صادق دی اولاد اچوں ہن تے سید شیر علی شیرازی دے پُتر ہن جنہاں دا مزار دہلی اچ ہے ۔ہر سال آپ دے م زار تے 23توں 25چیت کوں عرس میلا لڳدے۔اے ضلع سرگودھا دا مشہور ترین میلہ ہے۔علم و ادب دے حوالے نال ماضی اچ شاہ پور علاقے دا ہک مرکز ریہا ہے۔اتھاں اکثر ادبی مشاعرے تھیندن۔ معروف شاعر جوہر نظامی اتھاں دے رہݨ والے ہن۔ او 1909ء اچ پیدا تھئے تے 1992ء اچ انتقال کیتا۔ آپ دی شاعری دے ترائے مجموعے داستان حرم، لوح محفوظ تے وہم رسا شائع تھئے۔

شاہ پور شہر دی آبادی 1981ء اچ 9085تے 1998ء اچ 12085نفوس تے مشتمل ہئی ۔ جݙاں جو ایندی موجودہ آبادی 15ہزار دے نیڑے ہے ۔ شاہ پور صدر دی آبادی 1981ء اِچ 10061تے 1998ء دی مردم شماری دے مطابق 15313 نفوس تے مشتمل ہئی تے ہُݨ ایندی آبادی اٹھارہ ہزار دے نیڑے ہے۔