شاہ عبد الحق گیلانی

شاہ عبد الحق گیلانی گولڑہ شریف دے سجادہ نشین اتے روحانی شخصیت ہن۔ او پیر سید غلام محی الدین گیلانی المعروف بابوجی لجپال دے پتر اتے پیر سید مہر علی شاہ گیلانی دے پوہترے ہن۔ او 16 اپریل 1926ء بروز جمعہ المبارک بمطابق 3 شوال المکرم 1344ھ کوں گولڑہ شریف وچ پیدا تھئے۔ ابتدائی تعلیم قاری محمد پشاوریؒ توں حاصل کیتی جیہڑے اوں وقت مدرسہ گولڑہ شریف دے خطیب، مدرس اتے مفتی ہن۔ بعد ازاں انہاں دے والد گرامی بابوجی نے انہاں کوں مزید دینی تعلیم کیتے جامعہ عباسیہ بہاولپور بھیڄ ݙتا جیہڑی اوں وقت برصغیر پاک و ہند دی ہک وݙی دینی درسگاہ ہئی۔ انہاں دی خوش نصیبی دا اے عالم ہئی کہ انہاں کوں غلام محمد گھوٹوی جیہیں جیدِ عالم دین توں دینی تعلیم مکمل کرݨ دا موقع میسر آیا۔ تربیت دے حوالے نال مہر علی شاہ گیلانی والد گرامی حضور باؤ جی دی شب و روز محنت دا اثر انہاں دی ذات وچ نمایاں ریہا۔ 1974 وچ والد گرامی بابوجی دے وصال دے بعد انہاں نے 29 جولائی 2020 تک 46 سال مسندارشاد تے رہ تے مخلوق خدا دی خدمت کوں اپݨا شعار بݨائے رکھا۔ انہاں نے 8 ذی الحجہ 1441ھ بمطابق 30 جولائی 2020ء کوں 94 سال دی عمر وچ وفات پاتی۔