شاہ سلیمان پھلواری
مولانا شاہ سلیمان پھلواروی (1859-1935) بہار دی ہک اہم علمی شخصیت ہن۔ انہاں دا تعلق پھلواری شریف دے ہک معزز خاندان نال ہئی جتھوں ٻہوں سارے علما تے صوفیا اٹھے ہن۔ انہاں دا سلسلہ نسب امام محمّد تاج فقیہ نال ملدے جیہڑے بہار دے پہلے مسلم فاتح ہن۔ انہاں دی ماء بابا فرید دی اولاد وچوں ہن۔
انہاں ابتدائی تعلیم اپݨے مامے شاہ نعمت مجیب توں حاصل کیتی۔ بعد وچ لکھنؤ، سہارنپور اتے دہلی دے وݙے عالماں توں علم حاصل کیتا۔ انہاں صرف احادیث دی سند سٹھ ستر حضرات توں حاصل کیتی۔
انہاں علی گڑھ ایم اے او کالج دے ٹرسٹی دی حیثیت نال وی خدمات انجام ݙتیاں اتے ایں کالج کوں یونیورسٹی بݨاوݨ دی تحریک وچ وی انہاں دا اہم کردار ہئی۔ او انجمن حمایت اسلام لاہور، انجمن اسلامیہ پٹنہ اتے ٻیاں کئی اہم تنظیماں وچ پیش پیش رہے۔ او مجلس ندوۃ العلماء دے بانیاں وچوں ہن اتے اوندے پہلے اجلاس وچ انہاں نے فقہ، تاریخ تے تصوف تے نظر ثانی دی تجویز پیش کیتی ہئی۔
علامہ اقبال انہاں دا ٻہوں احترام کریندے ہن اتے اسرارِ خودی دے مسئلے تے انہاں توں رہنمائی ڳھدی ہئی۔ شاہ سلیمان پھلواروی پہلے شخص ہن جنہاں کوں علامہ اقبال نے لکھیا ہئی کہ انہاں دا تعلق سلسلہ قادریہ نال ہے۔