شاہنواز ارشد

اصل ناں       شاہنواز

تخلص         ارشدؔ

ڄمݨ           1969ء

تعلیم          میٹرک

پیشہ            زمیندارہ

فون نمبر        0300 7781877

جاہ پتہ        محلہ میانہ دُلّے والا ضلع بھکر

شاہنواز ارشد اردو تے سرائیکی ݙوہائیں زباناں وچ خوبصورت شاعری کریندن، کئی شعری کتاباں دے خالق ہن۔نثر وی لکھدن ، اخبارات اچ اکثر انہاندے مضامین چھپدے رہ ویندن۔شاہنواز ارشد بنیادی طور تے غزل گو شاعر ہن ،ہر شاعر غزل دا مزاج آشنا نہیں ہوندا ،مگر شاہنواز ارشد غزل دا مزاج آشنا شاعر ہے۔غزل دے موڈ مزاج کوں سمجھدے ، تے غزل کوں غزل دے تناظر اچ لکھدے۔تے غزل دے سارے لوازمات پورے کریندا نظر آندے۔نمونہ کلام ملاحظہ تھیوے۔

(1)غزل

اساں منظر توں ہٹ ڳئے ہیں اساں گمنام تھی ڳئے ہیں

اساں کہیں گزریے ویلے دا کوئی پیغام تھی ڳئے ہیں

کݙھاں اڳوان ہاسے پئے مگر اے وقت دی ڳل ہے

تساں ہُݨ خاص تھی ڳئے ہو اساں ہُݨ عام تھی ڳئے ہیں

ساݙی ہر ڳالھ وزنی ہئی ساݙی ڳل ڳل دی قیمت ہئی

تیݙے در تے میݙا دلبر ایویں بے دام تھی ڳئے ہیں

تیݙی سنگت توں پہلے ہک زمانے وچ مقام ہاسے

تیݙی سنگت دیوچ سانول ایویں بدنام تھی ڳئے ہیں

اساں جتھ ہیں ،جیویں ہیں پئے ساݙے اپݨے نصیب ارشدؔ

تیݙی زندگی سحر وانگوں اساں ہُݨ خام تھی ڳئے ہیں

(2)غزل

بٖس ازل توں ڳورے کالاں دا مقدر بݨ ڳئے

عقل مند اور بھولے بھالاں دا مقدر بݨ ڳئے

روز ݙیہدا ہاں چمیندے ہن تیݙے رخسار کوں

کتناں سوہݨاں تیݙے والاں دا مقدر بݨ ڳئے

پہلی واری تیکوں ملیا ہم ݙیہاڑا یاد کر

میݙا ہک پل تیݙے سالاں دا مقدر بݨ ڳئے

تیݙے فوٹو تیݙے سارے خط پراݨے تھی ڳئے

ہُݨ تاں سب کجھ گھر دے جالاں دا مقدر بݨ ڳئے

میں تاں باغی میݙی چھوٹی جھئیں بغاوت دے سبب

میݙے سارے شہر والاں دا مقدر بݨ ڳئے

میݙے اپݨے وس نی ارشدؔ میں بھلا ݙیواں تیکوں

تیݙا ناں میݙے خیالاں دا مقدر بݨ ڳئے

٭٭٭