شاہد یاسر
ج: 15اگست 1987ء
شاہد یاسر سے اَبا سئیں دا ناں چودھری محمد اسلم اے۔ ایہ نینگر محراب آلے دا راہوݨ آلا اے۔ بہشتی سفیر لشاری کوں اپݨا کلام ݙکھیندا ہا۔ شاعری دے دَڳ تے نواں آئے ۔ مادری زبان پنجابی ہِس پر سرائیکی اینویں روانی نال ٻولیندے جو بندہ سنڄاݨ وی نی سڳدا ۔
؎ بھِرا بھرانویں کوں مار ݙیون ‘ تے یار یاریں کوں خار ݙیون
ہوس دی بھاہ کوںٻجھینداںکوئی نی ‘ جو سب دا ہݨ اعتبار اُݙ ڳے
٭ بمطابق شناختی کارڈ، ملاقات شاعر ، محراب آلا، احمد پور شرقیہ۔یکم مارچ2012ء
کلام ٭
(1)
پَکھی واساں پَکھیروں تُوں ‘ اُوندے درجات کیا پُچھدیں
میں چا کاساں وَدا پنداں میݙی اوقات کیا پُچھدیں
میں کلھا بند کوٹھی وچ کئی سالاں توں روندا ہاں
کیویں نبھدے جو ہن میݙے ݙکھے ݙینہہ رات کیا پُچھدیں
میݙے ساہویں دے مالک آ‘ تیکوں بھلݨاں میݙے وَس نئیں
تیݙیاں یاداں کوں لا سینے تھیندی برسات کیا پُچھدیں
مشقت تے علالت نے‘ میکوں چچڑول کر چھوڑے
میݙے چہرے کوں پڑھ گھن توں‘ میݙے حالات کیا پُچھدیں
نا یاسر بݨ توں بݨ ساݙا‘ اساݙا تھی تے رُل ویسیں
اَساں تاں نِت نبھیندے پیوں ݙکھاں دے وات کیا پُچھدیں
(2)
عجیب ویلا ہے زندگی دا سکون اُݙ ڳے قرار اُݙ ڳے
او مار ہتھیں دے نال ساکوں جو آپݨاں ہئی یار اُݙ ڳے
ایں عشق مارو نے رول چھوڑے‘ دھاں ݙیوں تاں کیکوں ݙیوں
اَساݙی عیشاں دے نال نبھدی جو زندگی دا خمار اُݙ ڳے
بھِرا بھرانویں کوں مار ݙیون‘ تے یار یاریں کوں خار ݙیون
ہوس دی بھاہ کوں ٻجھیندا کوئی نئیں‘ جو سبھ دا ہݨ اعتبار اُݙ ڳے
حرام خوری نے ایں چودھاروں اساکوں لوکوں ولھیٹ گھدے
جو ٻاجھ رشوت دے کم نی تھیندا ایمان والا ویار اُݙ ڳے
اے سِجھ توں گھن تے نِماشاں توݨیں پیٹ پالݨ دا چنتا رہندے
بے روزگاری نے کم ݙکھائے ہن ذہن توں یاسرؔ دا پیار اُݙ ڳے
(3)
تیݙا نِکھڑݨ ساݙے کولوں‘ ساݙے جذبات کجھ کائنی
تیݙا شہر اے تیݙے شہر اچ‘ ساݙی اوقات کجھ کائنی
مقدر مونجھ ہے ساݙی‘ اَساں غم دے پلوڑے ہیں
ساݙے مَن اچ تیݙے سانگے سُکھاں دی رات کجھ کائنی
جو تھیسی زمانے کوں نواں وَل سوجھلا ݙیسوں
اَساں سِجھ ہیں زمانے دے اندھاری رات کُجھ کائنی
اَساں بھوئیں واس تھی کے وی‘ جہاں کوں اوپرے ݙسدوں
ستم ایہ ہے زمانے وچ ساݙے حالات کجھ کائنی
غماں وچ پل جواں تھئے ہیں ݙکھاں دے نال یاری ہے
توݨیں تن کوں جو لڳ ڳئی ہے سُنڄی سکرات کجھ کائنی
جیویں کیویں اَساں یاسرؔ نبھائی ہے نبھیسوں وی
قسم رب دی ساݙے کیتے فقط صدمات کجھ کائنی
٭ بمطابق بیاض شاعر
حوالہ
[لکھو | ماخذ وچ تبدیلی کرو]کتاب احمد پور شرقیہ اِچ سرائیکی غزل دی ٹور، مصنف : عبدالباسط بھٹی ، ناشر : جھوک پبلشرز ، ملتان