شاہد شاہ شاہد
شاہد شاہ شاہدؔ 1972ء کوں موضع کونڈی تحصیل و ضلع لودھراں وچ پیر فرزند علی شاہ دے گھر پیدا تھئے، میٹرک تک تعلیم حاصل کیتی ۔شاعری دے حوالے نال 1990ء کنوں مجید ناشاد دی راہنمائی وچ اپنی شاعری دا آغاز کیتا ۔شاہد مرحوم زبر دست شعری قوّت دے حامل شاعر ہَن ۔اردو، سرائیکی ڈوہائیں زباناں وچ خوبصورت شاعری کریندے ہن ۔سرائیکی اچ ڈوہڑہ ،غزل ، نظم، گیت قطعہ وغیرہ لکھدے ہن۔ جڈاں جو وڈی تیزی نال آپ دے 4 شعری مجموعے ،پندھ پتھراں دا، نیر نگال، غم دی شام تے جھات انہاں دی حیاتی وچ یعنی 2009ء تک چھپ کے منظر ِ عام تے آگئے ہن ۔اجاں شاہد شاہ شاہدؔ بہوں کجھ لکھناں ہا جو موت دا قاصد وقت توں پہلے آگیا تے آپ 13 اگست2015ء کوں صرف 43 سال دی عمر اچ اللہ کوں پیارے تھی گئے۔(1)
(1) غزل
[لکھو | ماخذ وچ تبدیلی کرو]پیت دا پینڈا ہے بارا ڈیکھ گھن عشق ہے بلدا انگارا ڈیکھ گھن
میڈے بارے سوچ سوچیں بعد وچ پہلے میڈا چن گزارا ڈیکھ گھن
کون کہیں دا بوجھ چیندے عمر بھر منگ تے ڈو ڈینہ اَن ادھارا ڈیکھ گھن
لیلیٰ وانگوں منگ تے گردن دا لہو کوڑ سچ دا سب نتارا ڈیکھ گھن
عشق دی بیڑی دا بندیں جے ملاح پیار دا شاہدؔ کنارا ڈیکھ گھن
(2)غزل
[لکھو | ماخذ وچ تبدیلی کرو]خزاواں دی بوٹی تے بور آندا ویندے
جو لگدے سجن کوں شعور آندا ویندے
ایں کاغذ دے پھُل دی نزاکت کوں ڈہدیں
غلابیں کوں وی ہُن غرور آندا ویندے
کھُلّا رکھدے بوہا او کیوں رات ساری
اوندے گھر کئی لگدے ضرور آندا ویندے
ایویں لگدے اوکوں رقیباں سکھائے
اوندی سوچ وچ کجھ فتور آندا ویندے
اوندا ذکر اج تاں ایویں تھیندا رہوے
اساکوں وی شاہدؔ سرور آندا ویندے
حوالہ
[لکھو | ماخذ وچ تبدیلی کرو]کتاب: میݙی دھرتی، میݙے لوک ، مصنف: ظہور احمد دھریجہ ، ناشر: جھوک پبلشرز ، ملتان 2018ء