شاپنگ دا حال

اساں ٻوٹ لہا کے چپلاں پاتیاں ۔پتلوناں دے پانچے اُچّے ولھیٹے تے بھون کنوں نکل پیوسے۔ دِلّی وچ چاندی چوک تے صدر بزار شاپنگ کیتے تھوک مال دے مرکز ہِن ۔ ریٹ سستا ہے پر مال درجناں دے حساب نال ملدے ۔ اساں پہلے چاندی چوک کیتے میٹرو تے ٻہہ ڳیوسے۔ چاندنی چوک پُڄ کے کجھ کپڑا‘ریڈی میڈ قمیضاں تے جیولری خرید کیتی ۔ ہر پاسے چِکڑ ہا ۔ گلٖھیاں سوڑیاں ہَن اینویں جیویں ملتان دی پتراں آلی ڳلھی ہے ۔ ٻاہر ہر پاسوں کاراں رکشے چِکڑ اُݙیندے لنگھدے پئے ہَن ۔ اندر بندیاں دے مونڈھیاں نال مونڈھا لڳدا ہا ۔ ہک ہندو نوجوان کنوں ململ ‘ قمیضاں دا کپڑا‘ دھوتیاں وغیرہ خرید کیتے ۔ ٻالاں کیتے ٹی شرٹاں مُل گھدّیاں ۔ تحفے ݙیوݨ کیتے وی تھولا ٻہوں سمان خرید کیتا ۔ اساں ہندوستانی قیمت کوں ݙوڑا کرکے پاکستانی قیمت دا اندازہ لیندے ہاسے۔ کیوں جو ساکوں پاکستانی سو روپے دے بدلے56ہندوستانی روپے ملّے ہَن ۔ برحال شاپنگ کریندیں کریندیں ݙو ترے وڄ ڳئے۔

چاندݨی چوک وچوں شاپنگ کرکے اساں جامع مسجد آلے پاسے اندری اندر پینتل سفر کیتا ۔ چِکڑ وچوں لنگھدے کریم ہوٹل تے پُڄ ڳیوسے۔ کریم ہوٹل وچ ہک واری پہلے روٹی کھا ڳے ہاسے تہوں ایندے کھاݨے اُتّے اعتبار ہا ۔ کریم ہوٹل رمضان شریف دی وجہ کنوں بند ہا ۔ نال دے ہک ٻئے ہوٹل وچ ٻہ کے کھاݨاں کھادا۔ دال دی ادّھی پلیٹ 25/-روپے دی تے گوشت دی ۔55/-روپے دی ہئی ۔ اساں ݙونہاں ادّھی اَدّھی پلیٹ دا آڈر ݙتا۔ کھاݨاں چنڳاں ہا ۔ رَڄ کے کھادا۔ راشد مصطفیٰ آکھیا جو اَڄ پہلی واری اعلا کھاݨاں کھادے۔میں آکھیا اَڄ آخری ݙینہوار چنڳاں کھاݨاں کھادے ۔ دِلّی دے بھون دے علاقے وچ ساکوں مطلب دا کھاݨاں نہ ملیا ہا ۔ موٹھ دی دال ‘ چݨیاں دی دال‘ بھنڈیاں ‘ آلو ‘ وصّل روز کھاندے کھاندے تھک ڳئے ہاسے ۔اَڄ ماس ملیا تاں خِشی تھئی ۔ نرھان وچ پُوریاں تے چھولے مِلدے ریہے ہَن ۔ جیندے نال ہولے ہولے بُکھ مردی رہی ۔ ہک ݙینہ وی ٹھڈا پاݨی رَڄ کے نہ ملیا ۔ منرل واٹر گھدا تاں اوہ وی دِلی وچ کَوڑا تے کھاراملدا ہا ۔ ہک اَدھ جاء تے برف نظر اَئی تاں اساں بوتلاں وچ برف گھت کے پیتی ۔ معلوم تھیندے جیویں دِلّی وچ ٹھڈا پاݨی پیوݨ دا رواج کوئنیں ۔ ٹھڈے پاݨی دی جاء تے اساں بوتلاں پیندے ریہے کیوں جو اوہ ٹھڈی ملدی ہئی ۔ کھاݨاں کھا کے نکلیوسے تاں شام دے پنج وڄ چُکے ہَن ۔

حوالہ

کتاب: دِلّی ڈھائی کوہ۔ مصنف شوکت مغل، چھپیندڑ: جھوک پبلشرز ‘ ملتان