شاعری عجائب گھر نی (حکایت)
حکایت
شاعری عجائب گھر نئیں
شاعری دی کتاب دا مُلھ ہک ٹکٹ نئیں جیڑھی تندیر دے بوہے تساں ڈے کر اندر خانے پَیہ ونجوں تے ورقہ در ورقہ عجائب گھر ڈیکھو
اول ایں گالھ دوں اشارہ ہک تریمت کیتا " شاعری دے عجائب گھر زمانیاں دے زنانے ہوٹھ زنانیاں اکھیں گلہاں گِچیاں جغرافیے دیاں دُنیاں گولائیاں تاریخ دے گھنگھریالے ان گھنگھریالے والاں دیاں ونکیاں تے بَک وانگوں کھیڈدیاں جنگل دیاں چھاتیاں زنانے پیریں دیاں بِلیاں ہتھیں دے کبوتر نظردن شیشہ در شیشہ الماری در الماری قصہ پِڑ قصہ چَھتی پِڑ چَھتی سنبھال وچ تے روز دے سنگھار وچ کارندے رُجھیے تریمتیں صدی در صدی گلیاں بزاراں وچ لیہ گیاں ہِن گوٹھ اپنڑے وَل گیاں ہِن "
ساکوں ایں تریمت دی حکایت اوں زمانے وچ سمجھ آئی جڈاں اِتھاں شاعر ساڈے اپنڑے دریاواں جنگلاں پہاڑاں تے بہوں پرانڑے شہراں کوں شاعری وچ ڈھویندے پئے ہَن.
(رفعت عباس)