شاعری دا پندھ

حکایت

شاعری دا پندھ

ہک شاعر ساکوں ٹکریا'اونکوں شاعری کریندیاں چالیہ سال گزر گئے ہَن'اوندی شاعری وچ حیاتی دا نکا نکا سیک ہک آندا ہا'اساں اوں توں پُچھییا اوہ شاعری کینویں بنڑیندے'اوں آکھیا...

1) میڈے کیتے شاعری لفظیں توں نِسری'لفظ دی تاکڑی کُھلی میکوں سیر جہان تے گِھن گئی' جینویں جو لفظ رِچھ,بیڑی یا سرہیوں اگاں میکوں ٹورن تے بھیت سارا کُھل ونجے 2) ڈاہ بارھاں سالاں پِچھوں میکوں اپنی شاعری دیاں تصویراں نظرن پے گیاں'ایں چِتر کوں بیت بناونڑ دا مراقبہ میں کیتا'جینویں جو اکھیں نُوٹ کے مَتھے دی اشارت وچ کروڑاں ارباں کوہاں دا پندھ کر ونجنڑا'جینویں جو مچھیاں نال ترنڑا پکھیاں نال اُڈنڑا'لوکیں دی بِھیڑ وچ ہکے ویلےاگاں پچھاں ٹُرنڑا'سامنڑے اینویں تصویر ہک بنڑنی تے بیت وچ ڈھل ونجنڑی 3)اگاں وت خوابیں دا زمانہ آیا'خواب میڈی شاعری دی ورکشاپ بنڑ گئے'سارا ڈینہ کم کار دوستیں کوں ملنڑا تے راتیں جلدی سم ونجنڑا جو خوابیں دے کرخانے وچ بیت بنڑاونڑا ہے'بہوں ساری شاعری میں نندر دی کھڈی اُتے کَتی تے جاگدیاں ایہو کاپ لہایا 4) اگاں وت دیہاں دی کوٹھی دا ویلا آیا'کوٹھی در کوٹھی آکھو دیہ بیٹھے میڈے کیتے بیت بنڑیندے ہِن'حکیم ہِن سنارے ہِن کیمیاگر نِلہاری'ہک وچوں دیہ وت صوفی فقیر توں میر پور خاص تئیں سڑکی روشن کیتی ہے ڈوجھے کہیں واجے تے کشوریا امونکر دا بھیم پلاسی لا ڈتے'کہیں ملتان وچ کارونجھر دے موریں دا کرکار ہک مچایا ہے'کوٹھی در کوٹھی اوہ میڈے کیتے بیت بنڑیندے ہِن 5)میڈی شاعری ہنڑ لوکیں ذمے'اوہ میڈے کیتے شاعری کریندن'اوہ اپنڑیاں گالہیں وچوں شاعری میکوں ڈیندن'اُنہاں دیاں گالہیں دے وَنڑ توں بیت میڈے دا میوہ لہندے'لکھاں کروڑاں لوک میڈے کیتے شاعری بنڑیندن

اساں اوں شاعر کوں نزدیکی ہک ہوٹل تئیں گھن گئے'چا پلائی تے بہوں ساریاں گالہیں کیتیاں. (رفعت عباس)