شادی دے گیت

چاور ماں وی کھائیندُم ساری جنج کھائیندی

جے کو تروبچیندو ‘ اوہ اِیز کھائیندے

(چاول میں وی کھادے ‘ ساری جنج وی کھاندی پئی ہے ۔ جے تُساں کجھ بچیندو تاں اوہ سٻالا کھا ویسی)

ایندے نال اِی میں سندھی بھراواں کوں ڈھیر ودھائیاں وی ݙیوݨ چاہنداں جو اُنہاں دیاں کوششاں نال سندھی بھاشا کوں ہندوستان وچ کجھ مَہت (مقام)تاں مل ڳیا ۔ سندھی ساہت اکیڈمی پُر سرکار (انعام) وی ݙیندی ہے ۔ دِلّی سرکار نیں اُنہاں کوں اکیڈمی وی ݙتّی ہے۔ کانفرنس دے کرتا دھرتا مہاندریاں کوں وَدھائی جو اوہ ایݙے وَݙے جلسے دا انتظام کریندے پئین ۔ اَڄ اِتھاں سندھی دے وݙے وݙے ادیب تے لکھاری موجود ہن ۔ سندھی دیاں کتاباں چھپدیاں پئین ۔ ساݙے ہمسایہ مُلخ کنوں ‘ جہڑا ساݙا ݙاݙکا تے نانکا ہے ‘اُتھوںساݙے مَسات تے مُلویر وی آئے ہوئن ۔ اساں چاہندے ہیں جو ساݙے سنگ ایݙے پکّے تھی ونڄن جواَساں ٻئے دے ہنجوں اپݨیاں اَکھیں وچ محسوس کر سڳوں اَتے ہک ٻئے دے ݙکھاں تے خُشیاں وچ شامل تھی سڳوں۔ سارے سندھی بھراواں کوں سرائیکی بھرا دا سلام۔

ڈاکٹرراج کمار ملک ‘ دِلّی

موبائل :                  0091- 9810116001گھر:0091- 11- 25260049

دفتر                                    0091- 11- 25735623

(ایہ مضمون انٹرنیشنل سندھی کانفرنس دِلّی 2009ء اِچ پڑھیا ڳیا)

……………

ڈاکٹر راج کمار ملک سِٹھنیاں ‘ لولیاں تے ماہیئے وی سُݨائے ۔ ہک نِکڑی جہی لولی:

لولی لولی لولی

امبڑی جھلّے جھولی

لولی لال کوں ݙیواں

نِکّے ٻال کوں ݙیواں

میں ڈاکٹر راج کمار ملک کنوں اُنہاں دے مذہبی رہنماواںبارے پُچھیا تاں اُنہاں تلویں درجے کنوں ایںشروع کیتا اَتے میکوں مسلماناں دے مذہبی رہنماواں دے حوالے نال سمجھایا:

(1) ٻامݨ ؍پنڈت … جونیئر مولوی (ایہ مندر دا خادم ہے) پوجا نھیں کرویندا

(2)پروہت …… سینئر مولوی ۔ مندر وچ پوجا کرویندے

(3)مہنت……گُرو ‘ ایہ مندر وچ پُوجا نھیں کرویندا

(4)مہامنڈیش ور……کئی مہنتاں دا وݙیرا

(5)شنکر اَچاری…… سب توں وݙا مذہبی گائیڈ

(اِنہاں ساریاں کوں ’’رُشی) آکھیا ویندے یعنی اللہ آلے ‘ نیک لوک) بعضے مہنت ‘ مٹھ بݨا کے ٻہہ ویندن ۔ اَتے لوکاں کوں اَپݨے کن راغب کریندن۔

تقریباً 4:30وڄے مینہ وَسّݨ مُک ڳیا ۔ راج کمار سئیں ݙوجھی وار چاہ دا آرڈر ݙتا ۔ کلرک چاہ گھن آیا تاں ڳالھیں دی راند وَلدی ٹُر پئی ۔ جے تئیں پنج وڄ ڳے ۔ راج کمار سئیں دا ویزا مُک ڳیا ہئی ۔ اُنہاں بیگم دے حضور پیش تھیوݨاں ہا ۔ دِل نہ چاہندیں ہوئیں تلّے لتھوسے ۔ چوک اِچ اُنہاں دی گݙی مینہ اِچ دھوتی دھانتی کھڑی ہئی ۔ اُنہاں دے دفتر دے تلّے حلوائی دی دکان ہے ۔ اساں اُتھّاں تکونے پُراٹھے پکدے ݙٹھے۔ میݙا ارادہ ہا جو اَڄ کرنسی تبدیل کرویساں۔ میݙے کول 300ڈالر ہَن پر ہُݨ مینہ دے بعد کرنسی چینجر دے دفتر بند تھی چُکے ہَن ۔ اَساں راج کمار نال کار اِچ ٻہہ ڳیوسے اُنہاں کار سٹارٹ کیتی۔ سڑکاں اُتے تھولا تھولا پاݨی کھڑا ہا ۔ اُنہاں ݙسیا جو حالی مینہ تھولا وَسّے جے زیادہ وسدا تاں سڑکاں اُتوّں لنگھݨ اوکھا تھی ونڄے ہا ۔ راج کمار کوں یادآیا جو گھر دے ویزے آلی طاقی تاں بوتلاں دا کریٹ ݙیوݨ نال کُھلسی ۔ تہوں او پِچھوّں مڑے۔ہک دکان توں بوتلاں دا کریٹ چَتونیں اَتے بہاول پور بھون دی راہ گِھدونیں ۔ پاݨی وچوں گݙی بعضیاں جائیں تے تردی ویندی ہئی ۔ اُنہاں ساکوں بہاول پور بھون اُتّے لہا ݙتا اَتے آپ گھر دو روانہ تھی ڳے۔اُنہاں اگلٖے ݙینہ نؤں وڄے آوݨ دا وعدہ کیتا۔

حوالہ

کتاب: دِلّی ڈھائی کوہ۔ مصنف شوکت مغل، چھپیندڑ: جھوک پبلشرز ملتان