شادی دے حوالے نال چھیکڑی پوسٹ

"شادی دے حوالے نال چھیکڑی پوسٹ"

وقت ساڈے کول زیادہ تیز نئیں بھج سکدا اساں وقت دے سوہڑیں لمحے قید کر گھناں تاں باقی وقت کول کجھ نی بچدا. ایہا جئے لمحے انسان لُگا قید نی کر سکدا پوری ہک ٹولی دی لوڑ ہوندی انہاں رنگ برنگے مزاجاں نال خوشیاں دی ست رنگی پینگ بنڑدی اے. ایہا جئی رنگاں تے خوشیاں بھری ہک پینگ دے ہُلاراں دی چس اساں چار ڈینھ چائی ہے. دوستاں ہک دفعہ وت پِڑ آباد کیتائے. یعنی ساکوں آباد کیتائے.

طاہر دی شادی دا حال فیس بک دے دوستاں کوں سنڑاون دا مقصد اے بلکل نئی جو اساں کوئی دنیا توں وکھریاں شادیاں کریندے ہاں، ساڈے کول پیسے ڈھیر ان تے باقی کہیں کول کوئی شئے کوئی نی ، ساڈے دوست ساکوں پیار کریندن تے ہور لوکاں دے دوست انہاں کوں پیار نئیں کریندے، گھمر ہکا ساکوں آندی تے ہور کہیں کوں گھمر نی آندی ... نئیں انجیں بالکل نئیں دنیا رنگاں تے سوہنڑپ نال بھری پئی ہے تے اساں جو ہاں تے جتلے ہاں او سارے دوست جانڑدن... شادی دا حال ڈینونڑ دا مقصد آپڑیں ریت زندہ کرنڑ دا ہئی نویں نسل آپڑیں ریت، روج، رسماں، اَس تس تے ایہا جئیاں بہوں ساریاں سوہنڑیاں شئیاں توں بہوں دور تھیندی ویندی اے.. ساڈا سکون راحت یعنی ساڈی چس ساڈے وسبے نال جُڑی ہوئی ہے اے چس چانونڑ کنڑ ساکوں ساڈے وسبے نال جُڑنا پوسی تڈاں اساں ہک امن سکون تے شانتی دی زندگی گزار سکدے ہاں جہڑی ساڈے بزرگ گزار گئے ہن.... شر دے خاتمے کنڑ ساڈے کول سب توں وڈا ہتھیار ساڈی اَس تَس تے جی پریت اے ساڈے ڈھولے ہن ساڈے ماہیے ہن ساڈے گاہونڑ ہن ساڈے شعر ہن ساڈی شرنا ہے ساڈا دول ہے ساڈی گھمر ہے. اے ساریاں شئیاں ساکوں ہک ڈوجھے نال جوڑنڑ دا بہانہ بنڑدیاں ہن دلاں وچوں کدورتاں ختم تھی ویندین، اساں ہکے رنگ اچ رنگےویندے ہاں ساڈے درمیان نسلی، لسانی، مذہبی، مسلکی، سیاسی، سارے فرق ختم تھی ویندن تے وت اساں ہکو جئے تھی ویندے ہاں. مطلب شر ختم تھی ویندئے تے روحانی طور تے اساں ہک بیا دے بیڑے تھی ویندے ہاں.

میں کوشش کیتی اے جو شادی دے رنگ دوستاں تئیں پہنچدے رھون اختر مجاز بڑی محبت نال رنگاں بھری رات وچ گھمر دی ویڈیو دوستاں تئیں پہنچا کے دل جت گھدن بہوں ںسارے دوست انہاں رنگاں وچ آپڑیں رنگ رلیندے رہے روزی روٹی دی گول وچ ملک توں باہر بیٹھے پردیسی بھرا خوش تھئے ہن انہاں وی چس کوں محسوس کیتائے اس طرح او وی شادی وچ پورے پورے شریک تھئے ہن دعائیں ڈتیاں ہن مبارکاں ڈتین..... خیر مبارک.... میں ساراں دا شکرگزار بلکل کوئی نا کیوں جو دوستاں دے شکریے نئیں مانڑ ہوندن. طاہر.... تیڈی شادی دے خواب کہیں کہیں نن ڈٹھے؟ آپڑیں سِر دے کپڑے دی چُوک نال ساڈے کنڑ روئی بدھ کے بہونڑ آلی ڈاڈی ٹُر گئی تاں ساکوں بُکھ ویڑھ گھدا ، ڈاڈے دے اکھ نوٹنڑ دی دیر ہئی ساڈے پِڑ برباد تھی گئے، چاچا غلام حسین تے وت بابا حاجی ٹُر گئے.ہالیں ہنج وی نئی سُکی جو ذمہ داریاں دی پَگ بابے دے سر تے آ گئی تے اساں آپڑاں آپ تہاڈے حوالے کر ڈتا.... او ڈینھ تے اج دا ڈینھ ہے ساکوں بس ہکا خوشی ہے جو اساں تہاڈیاں خوشیاں کنڑ جیندے پئے ہاں.... تیکوں شادی مبارک ہووے اج توں.... توں وی ساڈے آر تھی گیا ہیں اللہ تہاڈی جوڑی سلامت رکھے ہمیشہ خوش ہسدے تے وسدے راہوو ............تہاڈی پہلی روٹی ساڈے گھر ہوسی.(محمد ظہیر احمد مہاروی)