شادی تے نٹ

شادی تے نٹ اَمدے ہن، ٻڈھے تے نینگر وی ہوندے ہن ڈھیر سارے بے ریش چھوکرے ہن، او زنانہ ویس پا تے تماشہ کریندے ہن،سُرخی پوڈر لاتے ٻے سوہݨے بݨ ویندے ہن ۔غضب دے ݙوہڑے تے گاوݨ اکھیندے ہن ،گاوݨ تے جھمر کھیݙدے ہن، لوک ویلہاں  ݙیندے ہن، شوقین اپݨے پسند دے نٹ کوں  ویلھ ݙیندے ہن ،ہک روپے دا رواج ہوندا ہا ،وستی دے نینگر یار ہک ٻے دی ڳلھ تے نوٹ رکھ تے نٹ کوں  سݙیندے ہن۔ نٹیں  دا جمعدار ویلھ ہوکیندا ہا، روپے چار تھیون ہا تے او چوݙاں  ہوکیندا ہا ، ویل دا مقابلہ تھیندا ہا ، باشت ء ِچ نٹیں  کوں  فیدا تھی ویندا ہا ،وستی دے اَدھ نینگر سوہݨے نٹیں  تے عاشق تھیندے ہن تے انہائیں  دا خذمتاں  کریندے ہن۔

حوالہ

کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان