شئیں دے اَگھ

چاچا سئیں  ݙسیندے ہن جو ایوب دور توں تھولا پہلے کھنڈ پوݨے ݙو روپے سیر ،اَٹھ آنے سیر کھیر ، ݙو آنے کوپ چاہ ، مکھݨ ترائے روپے سیر ، تیل سرم 2رو پے سیر ، دال چݨا سوا روپے سیر ، دال موہری ݙڈھ روپے ، دال منگ ݙڈھ ، مرچ پسی اَٹھ آنے سیر ، کݨک 16روپے مݨ ، سونا چار سو روپے تولہ ، مٹی دا تیل 10روپے کنستریعنی 4گیلن ، لوݨ ٹکے سیر ، بھنے چݨے اَٹھ آنے سیر ، صابݨ کپڑے دھووݨ آلا آنے دی چکی ، کھار روپے سیر ، وسل ݙو روپے مݨ ، چھوٹا گوشت سوا روپے سیر ، ڳڑ روپے سیر ، دیسی کھنڈ ݙڈھ روپے ، شکر سوا روپے ، نسوار روپے دا ڈبہ ، اَمب اَٹھ آنے سیر ، خجی چار آنے سیر ، پھٹی 15روپے مݨ ،مزدور دی ݙو روپے ݙیہاڑی۔

بس کذانے اَمدی ہئی ، ٹانگے ڈھیر ہوندے ہن ، بس دا کرایہ وستی توں  خان پور تک اَٹھ آنے ہوندا ہا۔ ٹانگے دا وی ۔ گائوں  سجل سؤاسوا ݙو سو تے پھنڈی سو روپے دی ہوندی ہئی ۔ وستی ءِچ جام چوہڑدھریجہ محمد قصائی تے غلام نبی دھریجہ مسادی پیندے ہن ، چار ساڈھے چار مݨ دی پھنڈر دی سو ونڈی کریندے ہن ہک ونڈی ہک روپے دی ہوندی ہئی ، مسادی پاوݨ آلے چم سری پاوے ، زیرہ ، ٻکی ، تے اوجھری بچ ویندی ہئی ۔ ادا محمد دین دھریجہ ݙسیندے جو مدت آلے وی مسادی پیندے ہن ، میں  پُچھیا مدت آلے کون ہوندن انہاں  آکھیا گینگ مین۔

حوالہ

کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان