سینڈر چوما ڈی کوروش

سینڈر چوما ڈی کوروش (27 مارچ 1784/8 – 11 اپریل 1842) ہک ہنگریائی لسانیات دان اتے مشرقی علوم دے ماہر ہن ، جیڑھے پہلی تبتی انگریزی لغت اتے گرائمر کتاب دے مصنف ہن ۔ انہاں کوں تبتی اچ "پھائی-گلن-گی-گرا-پا" سݙیا ویندا ہئی ، جیندا مطلب ہے "غیر ملکی شاگرد" ، اتے 1933 اچ جاپانیاں انہاں کوں بوساتسو یا ٻودھی ستوا قرار ݙتا ۔ انہاں دا ڄمݨ دا مقام کوروش ، ٹرانسلوانیا دی گرینڈ پرنسپلٹی (اڄ کل کوواسنا ، رومانیہ دا حصہ) ہئی ۔ انہاں دی ڄمݨ دی تاریخ اکثر 4 اپریل ݙتی ویندی ہے ، حالانکہ ایہ اصل اچ انہاں دے بپتسمہ دا ݙینہہ ہے اتے انہاں دی ڄمݨ دا سال کجھ مصنفین 1784 دی بجائے 1787 یا 1788 قرار ݙیندن ۔ میگیار نسلی گروہ ، سیکیلز ، جئیں نال انہاں دا تعلق ہئی ، یقین رکھدے ہن کہ انہاں دا تعلق اٹیلا دے ہن قبیلے دی ہک شاخ توں ہے جیڑھی پنجویں صدی اچ ٹرانسلوانیا اچ آباد تھئی ہئی ۔ لسانی رشتہ داری دا مطالعہ کر تے سیکیلز اتے میگیاراں دے ماخذ دی جاہ لبھݨ دی امید اچ ، او 1820 اچ ایشیا روانہ تھئے اتے اپݨی زندگی تبتی زبان اتے ٻدھ فلسفہ دے مطالعہ اچ گزاری ۔ چوما ڈی کوروش کوں تبتیات دا بانی سمجھا ویندا ہے ۔ آکھیا ویندا ہے کہ او ستارہاں زباناں اچ پڑھ سڳدے ہن ۔ او 1842 اچ لہاسا دے سفر دی کوشش کریندے ہوئے دارجلنگ اچ فوت تھی ڳئے اتے ایشیاٹک سوسائٹی آف بنگال انہاں دے اعزاز اچ ہک یادگار تعمیر کروائی ۔