سیف الملوک اسیݙے گھر ء ِچ ہئی

سیف الملوک اسیݙے گھر ء ِچ ہئی، ابا سئیں  ݙسیندن اڄاں  میں  پرنیا کائنا ہم ،جوانی ہئی، سیف الملوک دیوانہ کر ݙتا، کتاب منظور احمد درکھاݨ کوں  آ منتاں  کیتیاں  ،آ منتاں  کیتیاں  جو نقل کراوݨ ݙے، او نہ منیندا ہا، چھی مہینے پچھوں  لڳا رہ ڳیُم، اوڑک من ڳیا، اپݨی وستی دے خوشخط مولوی امان اللہ صاحب نال ویہہ روپے اُجرت مُکی، میں  22روپے دی ٻکری ویچ تے سیف الملوک نقل کرائی، میکوں  لوک پاڳل آکھݨ پئے ڳے جو ٻکری ویچ تے کتاب نقل کرائی ء ِ، ابا سئیں  کتاب کہیں کوں  نہ ݙیندے ہن،اُستاد دا پُتر مشتاق احمد دھریجہ مظفر گڑھ مِل ء ِچ کم کریندا ہا، حجت کر تے چا ڳیا، اتھاں  انہاں  بندے کوں  قتل کر ݙتا، ڈھکیج ڳیا اوندے سامان نال سیف الملوک وی رُل ڳی، ابا سئیں  کوں  سیف الملوک دے ونڄݨ دا ارمان مردیں  تئیں  نہ ڳیا۔

حوالہ

کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان