سیف الملوک
حضرت سلیمان دے زمانے وچ مصر اتے شاہ عاصم نامی ہک بادشاہ حکومت کریندا ہئی۔ اوندے گھر اولاد نہ تھیندی ہئی۔ نجومیاں حساب لا کے ݙسیا کہ اگر اوندی شادی ملک یمن دی شہزادی نال تھی ونڄے تاں اوندے وچوں سجھ چندر توں سوہݨا ہک شہزادہ ڄمسے ۔ صالح وزیر دیاں کوششاں نال شاہ عاصم دی یمن دی شہزادی نال شادی تھئی تے اللہ سئیں انھاں کوں چندر جیہا سوہݨا پتر شاہ سیفل عطا کیتا۔ نجومیاں پیشگوئی کیتی کہ شہزادہ کوں جوانی وچ ݙاڈھے ݙکھ کشالے آسن۔ بادشاہ ایں ݙر توں چوݙاں سال تئیں شہزادے کوں وزیرزادے سعد دے ہمراہ بھورے وچ پالیا۔ ہک ݙینہ شہزادہ پرستان دے بادشاہ شہپال دی لڑکی بدیع البانو پری دی تصویر ݙیکھ تے اوندے عشق وچ مبتلا تھی ڳیا تے آخر اوندی ڳول وچ ٻہوں وݙا بحری ٻیڑہ تیار کرا تے روانہ تھی ڳیا۔ پہلے چین تے ول او قسطنطنیہ ڳیا۔ بعد وچ ٻیڑہ بحری طوفان دی نظر تھی ڳیا۔ شہزادہ کلہا پہاڑاں ‘ جنگلاں ‘ سنج بر تھلاں دے ݙکھ بھوگیندا زنڳیاں ۔ گورن پکھی ،باندراں دی قید وچوں نکلدا ہک ویران جنگل اِچ جادو دے ہک محل وچ پُڄا۔ اتھوں شہزادے دیو دی قید وچوں سراندیپ دی شہزادی ملکاں کوں نجات ݙیوائی۔ شہزادی ملکاں دے ذریعے شاہ سیفل دی پری نال ملاقات تے ول محبت تے آخر وچ شادی تھئی۔ ایں طرح شہزادہ دل منگدی پری کوں پرنیج تے اپݨے وطن واپس ولیا۔
حوالہ
[لکھو | ماخذ وچ تبدیلی کرو]کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان