سید ولایت شاہ
اساں اختصار توں کم گھندیں ہوئیں چھیکڑ وچ حضرت سید ولایت شاہ گیلانی دے صوفیانہ کلام دا نمونہ پیش کریندے ہیں ۔
صبا ونڄ آکھ دلبر کوں میݙے درداں دا افسانہ
ڄمݨ سیتی اماں مٹھڑی پلایس عشق دی گُھٹڑی
کݙے ویساں ݙوکھی کوٹھڑی
نہ جی وس وچ نہ جانانہ
کیا آکھاں حال دلبر دا کݙیں شاہ ہے کݙیں بردا
کݙے ڈھولک تے سر دردا
کݙیں مطرب تے میخانہ
صباول چاچڑیں جاویں ‘ ایہا ٻدھ عرض سݨواویں
ادب دے نال پیش آنویں
اوہے دربار شاہانہ
حضرت خواجہ فرید دے صوفیانہ دبستان دے علاوہ اوں دور دے صوفی شعراء وچ حضرت سخی فقیر راضی‘ حضرت پیر سید شیر محمد گیلانی ‘ صوفی نبی نخش ‘ صوفی رکھیل شاہ قابل ذکر ہن۔ سرائیکی شاعری دی صوفیانہ شاعری دا کوئی حد ٻنا ںکینی۔ حضرت بابا فرید الدین گنج شکر توں گھن تے حضرت فریدتئیں ایں علاقے وچ تصوف دی سرمستی صدیاں تئیں روحاں کوں برمیندی رہی ہے ۔ صوفیا دے ایں صلح کل مسلک تے فراخدلانہ روش نے لکھاں لوکاں کوں حقیقت تے معرفت دے رستے ݙکھائے۔ غیر مسلم لوکاں وی ایں ریت روش توں فیض حاصل کیتے۔ لوک تصوف دی بکل ویڑھ تے روحانی تے ایمانی حظ چیندے ریہے۔
سوز و گداز دیاں سیڑھاں دلاں وچ وہندیاں ریہاں۔ عرفان دیاں سوغاتاں ہک دل توں ٻئے دل تئیں ونڈیندیاں ریہاں تے اسلامی تصوف دے شعری اظہار دیاں بے نظیر تحریراں وجود وچ آندیاں ریہاں۔ سرائیکی زبان دے صوفیانہ شعری ادب وچ زیادہ تر مسئلہ وحدت الوجود تے عشق حقیقی دا بیان ملدے۔ شعراء سب توں زیادہ شعر انھاں ݙوں موضوعات تے آکھین ۔ ایندے علاوہ دنیاوی بے ثباتی ‘ مولویاں دی تنگ نظری ‘ ظاہری علوم عبادت دی نفی ‘ باطنی طہارت دی فضیلت تے عشق رسولؐ کوں شاعری دا موضوع بݨایا ڳے۔ تصوف دیاں خاص اصطلاحات دے علاوہ مقامی حوالیاں ‘ لوک داستانیاں دے کرداراں تے وسیبی علامتاں کوں وی تصوف دے بیان وچ وݙے سوہݨپ تے سلیقے نال ورتیا ڳے۔
حوالہ
[لکھو | ماخذ وچ تبدیلی کرو]کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان