سید مبارک شاہ
سید مبارک شاہ احمد پور شرقیہ دے ہک معروف سید گھراݨے نال تعلق رکھدے ہن۔ آپ ریاست بہاول پور دے نواب صاحب کول اہلمدتوشہ خانہ میگزیں مقرر تھے۔ انھاں دے کلام وچ رعایت لفظی ٻہوں ہے۔ ہک ہک لفظ کوں مختلف مفہوم وچ ٻدھن دے فن دے ماہر ہن۔ آپ زیادہ تر مولود شریف ‘ کافیاں تے ݙوہڑے لکھدے ہن۔ سید مبارک شاہ دا مجموعہ کلام داغ جگر چھپا ہویا ملدے ۔ ایں مجموعے وچ سی حرفی ہیر ‘ باراں ماہ ‘ کافیاں ‘ ݙوہڑہ جات تے مولود شریف شامل ہن۔ انھاں دا مجموعہ کلام داغِ جگر ماہ ستمبر1928ء وچ شائع تھیا ہئی۔ سید مبارک شاہ بنیادی طور تے ݙوہڑے دے ہک نمائندہ شاعر ہن۔
کلام دی ونکی
وچ پردیس مسافر کوں نت رہندی تانگھ وطن دی
قسم حسن دی
شہر بازاراُڄاڑ ݙسے نہ بھاوے بو چمݨ دی
قسم حسن دی
ہک پردیساں مونجھاں دل کوں ݙوجھی مونجھ سڄݨ دی
قسم حسن دی
سید مبارک بن دلبر دے ہم اُمید کفن دی
قسم حسن دی
سیدمبارک شاہ احمد پوری کافی سارے ٻاراں ماہ ‘ݙوہڑے ‘ کافیاں تے سی حرفیاں لکھن۔ بنیادی طور تے آپ ݙوہڑے دے شاعر ہن۔ آپ دے عشقیہ ݙوہڑے شعریت نال بھرئیے ہوئے ہن۔ انھاں دا سرائیکی ادب وچ چنگا چوکھا مقام بݨدے۔
بھیڑی دلڑی مفت ݙتوسے یار وفا نہ کیتا
میں کیا کیتا
میں تلیاں دی خاک تھیم اڳوں نبھا نہ کیتا
میں کیا کیتا
اپݨی طرفوں پوری کیتم ماہی ٹھہا نہ کیتا
میں کیا کیتا
ظالم یار مبارک شاہ کجھ خوف خدا نہ کیتا
میں کیا کیتا
مبارک شاہ کوں زبان تے بیان تے ٻہوں قدرت حاصل ہے ۔ او ہک ہک قافیے کوں کئی کئی معنی وچ استعمال کریندن انھاں دے ایجھے ڈھیر سارے ݙوہڑے ملدن۔
پیت پریت کوں توڑ نبھیساں جے تئیں جندڑی سردی
عشق بیمار کوں ہے دیدار نہ حکمت گرمی سردی
سر قربان کریساں باندی قسم ہے یار دے سردی
دلبر باہجھ مبارک شاہ نہیں ہرگز میݙی سردی
حوالہ
[لکھو | ماخذ وچ تبدیلی کرو]کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان