سید مالک اُشتر

اصل ناں       ۔۔۔۔۔۔

قلمی ناں       مالک اُشتر

ڄمنْ           1978ء

تعلیم          ایم اے

پیشہ           لیکچرار

فون نمبر        0333 3343572

جاہ پتہ         منگروٹھہ شرقی تحصیل تونسہ شریف

سید مالک اشتر دامان دی دھرتی دے قادرالکلام شاعر ہن، اردو تے سرائیکی ݙوہائیں زباناں وچ شاعری کریندن۔’’لہندی شام ‘‘ تے ’’ہاتھ ہمارے قلم ہوئے‘‘ آپ دے شعری مجموعے ہن۔شاعری دے نال نال اوہ ہک خوبصورت نثر نگار وی ہن۔انقلابی شاعر سرورؔ کربلائی تے غلام حُر خان کندانْی ہوراں دے فن تے شخصیت دے حوالے نال کتاباں لکھ چکے ہن۔اشتر سئیں دے حوالے نال معروف شاعر و ادیب جسارت خیالی لکھدن جو’’موصوف فیض احمد فیض سے بے حد متاثر نظر آتے ہیں ،ان کے ہاں انقلابی فکر کے ساتھ ساتھ لب و رخسار کی باتیں بھی ملتی ہیں۔وہ بھی رخسارپر غازہ اور صندلیں ، ہاتھوں پر حنا دیکھ کر مچلتے ہیں ، یہی وجہ ہے کہ وہ آذانِ ہجر کے بجائے وصل کی نماز پڑھنا پسند کرتے ہیں‘‘بہر حال سید مالک اشتر دا غزلیہ کلام حاضرِ خدمت ہے۔

غزل

اندھارے اُجالے دا کئی ݙر وی کئے نی

فقیریں دا کئی مستقل گھر وی کئے نی

میں جیندا ہاں میکوں زمانہ سݙیندے

توڑے میݙے بُت تے میݙا سر وی کئے نی

کیویں لوک میکوں میݙا غم سُنْیندن

میں چپ ہاں میݙی اکھ ذرا تر وی کئے نی

او نفرت دے نیزے ہتھیں پاکے آ گٖئے

میݙے کول کئی پیار، پتھر وی کئے نی

تیݙی اکھ ، اشارے تے منظر بدلدن

میݙی اکھ دیاں پپلیاں برابر وی کئے نی

اساں اوندے ہیں کیویں آکھوں اے مالکؔ

اساکوں الاونْ دا کوئی پھر وی کئے نی