سید عاصم اُچوی

میراں سید عاصم اُچوی ولد سید جعفر علی شاہ دا سلسلہ نسب مولانا امام حضرت علی ؑنال ونڄ ملدے۔1935ء کوں سید عاصم اُچوی اُچ موغلہ اچ پیدا تھئے ۔ والد ماجد سید جعفر علی سئیں سید غلام رسول ناں رکھیا وَت بابے سئیں دی جدائی بعد جݙاں سئیں اپݨے غماں کوں شعراں دا رنگ ݙے تے بیان کیتا ۔ وَت سید عاصم اُچوی مشہور کیتا ۔ سید عاصم اُچوی دا سرائیکی شعری مجموعہ ’’برف دا دھوں‘‘ غزلاں، نظماں ، کافیاں ، گیت ݙوہڑے شامل ہِن ۔ سید عاصم اُچوی سرائیکی دے مختلف اصناف سخن وچ طبع آزمائی کیتی ہے ۔ حمد باری تعالیٰ ، نعت ، منقبت ، نوحہ وچ اُنہاندا ہک الڳ تھلڳ انداز ہے ۔

آپ دا پورا ناں سید غلام رسول اے۔ عاصم اُچوی تخلص کریندن۔ آپ اوچ شریف وچ رہندن۔ اکثر کافیاں وچ جدتاں کریندے رہندن۔ زبان و بیان تے کافی قدرت رکھدن۔ روایتی شاعری دے نمائندہ شعراء وچ انھاں دا شمار تھیندے۔

کافی

توں خوش جال

قول نہ پال

میں ہاں بردی

تیں نینگر دی

دید مہر دی

بھال نہ بھال

ݙکھرا بھاڳے

عشق سہاڳے

کجل مساڳے

سینڳیاں نال

اپݨے اندر

شاہ سکندر

مست قلندر

جھولے لال

واہ تقدیراں

تن تے لیراں

وانگ فقیراں

میں بے حال

روندن ایہے

اغن پپیہے

عاصم وی ہے

مست    خیال

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان

کتاب: میݙی دھرتی، میݙے لوک ، مصنف: ظہور احمد دھریجہ ، ناشر: جھوک پبلشرز ، ملتان 2018ء