سید حسن رضا گردیزی
سید حسن رضا گردیزی ملتان دے مشہور سید گردیزی خانوادے دے فرد ہن۔ آپ اردو ‘ فارسی تے انگریزی ادب دا ٻہوں مطالعہ رکھدن۔ خوش مزاج تے خوش گفتار اور مجلسی زندگی دی ہر جا رونق ݙسدن۔ آپ سرائیکی ثقافت دی ہک ٹردی پھردی تاریخ ہن۔
سرائیکی زبان دے جدید شعراء وچ سید حسن رضا گردیزی دا ناں اُتے اُتے آندے۔ آپ غزل دی بجائے نظم کوں اپݨے اظہار دا وسیلہ بݨائے تے جدید رجحانات نال سرائیکی نظم کوں سہاڳݨ کر چھوڑئیے۔ الیاس عشقی انھاں دی شاعری بارے آہدن۔(31)’’او وقت دے بنیادی تے اہم موضوع دا انتخاب کریندن۔ جیندی وجہ نال انھاں دی شاعری نویں دور دی آواز بݨ ڳئی اے۔‘‘سید حسن رضا گردیزی دیاں نظماںاساݙی وسیبی رہتل کوں ظاہر کریندن۔ انھاں دا تجربہ تے مشاہدہ ٻہوں تیز ہے۔ او کُھلیں اکھیں نال معاشرے دی ہک ہک رمز کوں پرکھدے نظر آندن۔ اُنھاں دی نظم ’’نوکر دا ٻچہ‘‘ , ’’بندی خانہ‘‘,’’’پراݨا قلعہ‘‘,’’’سُنڄیاں سالھیں ‘‘ تے ’’تھل دیاں کھجیاں‘‘ سرائیکی زبان دے شعری ادب وچ ہک نواں موڑ اِن۔
سُنڄیاں سالھیں
تھل دے ہاں وچ لڳیاں جھوکاں
ٻلدے ریت دے ٹٻیاں پچھوں
بُھردیاں کندھاں اُڄڑے کھولے
چھپر کاٹھ کٻاڑ مُتوں
وچ ہک اندھے کھو دا ٹوبہ
وقت تے ریت بھرے نت جیکوں
ساہمنے کھجیاں دا ہک جوڑا
تُر تُر ݙیکھے ایں سُنج بَر کوں
آہدن پچھلی رات دے ویلے
جاں اے رات دے ٹٻے ٹھردن
لہندے چن دیاں پیلیاں کرݨاں
سنڄیاں سالھیں وچ آ وڑدن
اسماناں توں پوڑیاں لا کے
کئی اَݨ جانڑو بندے لہندن
گنگرو تے پا زیباں وڄدن
اے ݙوں کھجیاں جھوٹے کھاندن
پِیلا چن تے ٻݙدے تارے
جھمریں پیندن‘ وجد وچ آندن
لیکن جاں وت پو پھٹدی اے
اے سب روݨقاں ویندیاں رہندن
انھاں سُنڄیاں سالھیں وچوں
روون دیاں آوازاں آندن
حوالہ
[لکھو | ماخذ وچ تبدیلی کرو]کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان