سید جہان شاہ مجروح
حضرت جہان شاہ مجروح بہاول پور ڈویژن دے تاریخی قصبے اللہ آباد دے رہݨ والے ہن۔ آپ دا تعلق گیلانی سادات نال ہے۔ حضرت جہان شاہ مجروح خواجہ اللہ بخش تونسوی دے مرید ہن۔ آپ اپݨے وقت دے عالم دین تے صوفی بزرگ ہن۔ آپ کوں حضرت خواجہ فرید سئیں نال ݙاڈھی عقیدت ہئی۔ سید جہان شاہ مجروح حضرت خواجہ فرید سئیں کوں موسمی سوکھڑیاں وی بھجویندے رہندے ہن تے انھاں نال خط و کتابت وی تھیندی ہئی۔ میرحسان الحیدری دے مطابق سید جہان شاہ مجروح تبرکاً حضرت خواجہ فرید سئیں توں اصلاح وی گھدی ہئی۔(103) آپ سٹھ سال دی عمر وچ 27رمضان 1891ء ۔1308ھ کوں وصال فرمایا۔ آپ دا مزار مبارک شہر اللہ آباد تحصیل لیاقت پور وچ ہے۔
حضرت سید جہان شاہ مجروح بنیادی طور تے ݙوہڑے دے وݙے شاعر ہن۔ آپ دیاں سی حرفیاں پورے سرائیکی شعری ادب وچ فنی لحاظ نال ہک ممتاز مقام رکھدن۔ حضرت سید جہان شاہ مجروح دے ݙوہڑیاں تے کافیاں دے ݙوں مجموعے آگرہ توں 1919ء وچ شائع تھے۔ آپ دے کلام وچ درد ‘ فراق تے مونجھ ملال دے مضامین ݙاڈھے دل چھکویں ہن۔
ظ ظالم عشق تساݙڑے دی دل ظلم کرے بیچاریاں تے
لڳی آتش عشق اویڑے وی میݙی آئی جان انگاریاں تے
کرو رحم کرم رکھو قدم انھاں اکھیاں رو رو ہاریاں تے
مجروحا ماہی مہر کرے اساں درد فراق دے ماریاں تے
………
د درد تساݙے توں گھولیاں میں شالہ درد تیݙا تیݙی باندڑی نوں
باندڑی گھول گھماندڑی نوں ترساندڑی تے مہݨے کھاندڑی نوں
تئیں ٻاجھ ڈھولا نندرنیناں نہیں رکھ سمہندیاں سُول سراندڑی نوں
مجروح کوں چا مذبوح کرو گھت ونڈیاں مفت وکاندڑی نوں
حوالہ
[لکھو | ماخذ وچ تبدیلی کرو]کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان