سید اکبر شاہ (مصری بائی)

پ:1275ھ؍1858ء

سرائیکی زبان دے عشقیہ داستانوی ادب وچ ’’قصہ مصری بائی ‘‘ ہک وکھرا مقام رکھدے۔ اے عشقیہ تے رزمیہ قصہ سید اکبر شاہ دے اپݨے ذہن دی پیداوار ہے ۔ ایں داستان وچ جذبات نگاری دے ٻہوں سوہݨے نمونے ملدن۔ بائی دا محبوب ہک جنگی مہم تے ونڄݨ لڳدے تاں وچھوڑے دا ارمان بائی دا ہاں کڈھ گھندے۔

چڑھدیاں مصری خان دا بائی پکڑیندی لڑھ

من توں نام خدا دا ساعت تاں ہک ٹھہر

اول اساکوں مار تے پچھے گھوڑے تے چڑھ

حال سُݨیندی یار کوں ہنجوں وہن بھر بھر

سڄݨ ݙسن جاوندے رکھاں چُلھے کج

لوکاں لیکھے جگ وسدا میں قیامت اج

ایں قصے وچ جا جا تے عشق محبت دیاں دردو سیڑھاں وہندیاں پن۔ مونجھ تے فراق دے ݙکھ بھوڳݨ سُکھے کینی۔ جدائی نال بائی دے حال ظہیر ہن۔ محبت تئیں سکھ سنیہے دی کوئی راہ کینی۔ وچھوڑے توں موت دے آزار بھلے لڳدن۔

کڈھ کلیجہ ٻکیاں سینہ کراں چاک

لکھیاں مس کاغذ جوڑ تے ڳالھیں سب غمناک

کھلیاں لٹاں ڳل وچ منہ تے اُݙے خاک

ہور ناں ہوسی جگ وچ جیہیں میں ہلاک

جکھ جکھ اندر روندی آں ݙے ݙے ٻوہے کوں طاق

اس وچھوڑے توں منگدی آں موت ݙے سچا پاک

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان