سید احمد علی شاہ بخاری

  سید احمد علی شاہ بخاری سرائیکی شاعر ہے۔ ڄمݨاں1942ء

  سید احمد علی شاہ بخاری دے ابَا سئیں دا ناں سید غلام علی شاہ بخاری ہا۔ جݙاں جو قلمی ناں احمد علی شاہ مخمورہے۔ہُݨ توݨیں انہاں دیاں ݙو کتاباں ’’انمول نگینے‘‘ 1982ء ،’’ طوفان جذبات‘‘ 1987ء اِچ چھپی۔

غزل نمبر1

جݙاں میݙا جان بہار آندا ہوندے

میݙے دِل کوں ݙاڈھا قرار آندا ہوندے

چندر چار لڳدن رونق تھی ویندی

محفل دا سوہݨا سنگھار آندا ہوندے

چمن وِچ کھڑ تے جے او مسکراوے

سوہݨے پُھلاں تے نکھار آندا ہوندے

نگری شہر دی ہر شے ہے پیاری

میکوں سوہݨے لوکاں تے پیار آندا ہوندے

سچے نگاں دی جھلک ہے نظردی

مِلݨ جو مخمورؔ یار آندا ہوندے

غزل نمبر2

زندگی ایویں کٹیندے ودے ہیں

ݙکھ تے سُکھ وی نبھیندے ودے ہیں

کے تئیں غریب دی ، ایویں راہسی غریبی

ایہاسوچ انسان سوچیندے ودے ہیں

ہِن ہر پاسے بھانبھڑ نفرت دے ٻلدے

محبت دے ݙیوے ٻلیندے ودے ہیں

سُکھ دے ویلے جتھاں ونڄ گزاروں

ایہو جہیں جاء سیں ڳولیندے ودے ہیں

جذبہ اساݙا سچا ہے مخمورؔ

اَپݨے دِل کوں وندلیندے ودے ہیں

حوالہ

کتاب احمد پور شرقیہ اِچ سرائیکی غزل دی ٹور، مصنف : عبدالباسط بھٹی ، ناشر : جھوک پبلشرز ، ملتان