سیدفاضل شاہ

سید فاضل شاہ حضرت موسیٰ کاظم دی اولاد وچوں ہن۔ انھاں دے ݙاݙا سید علی حیدر استر آبادی فارسی زبان دے ہک وݙے شاعر تھی گزرین۔ سید فاضل شاہ پہلے دینی تعلیم حاصل کیتی۔ آپ دینی تعلیم مولوی عبداللہ ولہاری توں حاصل کیتی۔ ولہاری صاحب تھرپارکر دے ٻہوں وݙے عالم ہن۔ انھاں ݙینہاں قانون دے واقف کاراں کوں خصوصی وکالت دے سرٹیفکیٹ ݙتے ویندے ہن۔ ایں طرحاں سید فاضل وکالت دی سند حاصل کیتی۔ آپ اعلیٰ درجے دے ذہین تے پڑھیے لکھیے شخص ہن۔ آپ حیدر آباد تے ہالہ ڈویژن وچ مقدمات دی پیروی کریندے ہن۔ سید فاضل شاہ 1892ء وچ اپݨے چاچے دی وفات دے بعد شہر دے قاضی وی مقرر تھئے۔ آپ 67سال دی عمر وچ 19شعبان 1319ھ مطابق1900ء وچ وفات پاتی۔(62)

آپ نقشبندی مسلک رکھدے ہن تے آقا عبدالرحمن سرہندی دے مرید ہن۔ سید فاضل شاہ سندھی دے جدید شعراء دے پہلے دور دے نمائندہ شاعر تھی گزرن۔ اخلاقی تعلیمات ‘ شعر وچ مٹھاج ٻہوں ہے۔ آپ فارسی ‘ سندھی ‘ سرائیکی دے شاعر ہن۔کافی:

ݙس اَڄئی ہے حال یار

کر نماݨی تے نظر

ساں بھلائی بھال یار

ݙوٹھ ݙاڈھا چھڈ ݙمر

توں سوا سب تنگدسی

بالکل باطل بند بستی

معرفت جو حال یار

ساہ دا اے ہے ثمر

حب تیݙی ھوت ھاوی

شوق دل دی ذوق شادی

پرت ساں یار

کر عداوت تے نظر

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان