سہاڳ رات (رومانی مائیکروف)

رومانوی مائیکروف

.............................سهاگ رات

.................لکھت.منصور شانی

عمر دے اٹھارویں سال کوئ چھوهر کوڑھی نئ رهندی ت سجو تاں اونویں وی پورے وسبے دی شهزادی هئ.چٹا کھیر رنگ جیکوں ڈیهدیں هی گھٹ گھٹ پیونڑ لو دل آهدے, کالیاں شمور چلاک تے بلیار اکھیں دے اتو قدرتی سگھڑاپے دا ثبوت ستریے هوۓ بھربھٹیں دے تلو ڈو سیاه خال کبوتریں آلی کار پھیریاں کھاندیاں پپلیاں, چوڈی دے چندر آلی کار چمکدے متھے دے اتے جڈاں ساوا بوچھنڑ کالے خشبوئ والیں کوں کجی کھڑا هووے ها تاں چنبیلی دا پھل وی تر تر تکی رهندا ها, چٹے چوک چهرے تے رتے لال تھوڈیں دی نازکی گویا میر دا شعر ها, سوهنڑیں پتلے نک اچ چٹے نگ آلی کوکی دا لسکارا دنیا و ما فیها بھلاونڑ لو کافی ها تسلی نال گھڑیا هویا قالب کڈاھو وی گھٹ ودھ نی, نازک چٹی گچی جنت دے حوریں کوں شرما ڈیوے تے گچی مکدیں قیامت شروع تھیندی هئ.رنگ, انگ ت ستریے هوۓ بت آلی کار نسوانی سهنڑپ وی وسمی بال سگدا ها.ایں اچ جھک وچ بنده رل ونجے تاں خوش قسمت ها.اکثر پیرو راهنڑاں رهنڑ دی عادت زمین کوں پیر چمواونڑ دا حیله لگدی هئ. پر میں ایں سارے ستریے هوۓ حسن توں هٹ ت سجو دے ناز, نخرے ت بے نیازی دا عاشق هامیں. چار کوٹھیں آلی هکی حویلی ألے گھر اچ میں اج تک اے نامی سمجھ سگیا جو او میڈے نال پیار کریندی هے یا کائناں میں جڈاں اوکوں پیار دی گال کراں او میکوں وڈا مجنوں آکھ, کھل ت ٹال ونجے,میں اوندا ناں کاغذ ت دل بنڑا کے لکھاں تاں اے گال کر تے مٹا ڈیوےجو آپ نال پیار کر, میکوں یاد هے هک دفعه میں آکھیا ها توں میکوں نه ملی تاں میں هیڈ اچ جمپ مار ویساں تاں اوں آکھیا میں کهیں لو اپنڑی زندگی نی کھٹا سگدی میں تاں اپنڑی حیاتی تو وی پنج ڈاه سال وادھو جیساں.سچ هے جو سجو دے ایں انداز تے بے پرواهی دا تاں میں عاشق هامی. بس میڈا دل آهدے او وی میڈے نال پیار کرینی هئ. کل ساڈی سهاگ رات هئ پھلیں اچ بهار بنڑی سجو میکوں کھمب کھتڑیے پکھی آلی کار بےوس لگی هئ. پھل آنگوں ترڑدی سجو چھوئ موئ دا پترا بنڑی بیٹھی هئ.میکوں لگدے سجو دے نخرے, ناز انداز تے ادا میڈے نکاح دی محکوم تھی گئ هے.میں آپ کوں سجو دی بے نیازی کوں قید کرنڑ دا مجرم سمجھداں. میں محکوم جسم نال عشق نی کر سگدا. کاش اے سیاه رات جیکوں لوگ تاں لوگ خود سجو وی سهاگ رات سمجھے میڈی زندگی اچ نه آندی...(منصور شانی)