سگِ دنیا …… ردِ انقلاب

انقلاب دشمن دُنیا دا کُتا ہوندے

یاں

کتے اِی انقلاب دشمن ہوندن

جاگیرداریں کیتے اے سب کُجھ برداشت کنوں ٻاہر ہا ، نہ صرف انہاں دا روپ عوام تے ختم تھیندا ویندا ہا ، وَت جو اُنہاں دی زمینیں تے کم کرݨ آلے راہک ، مزیرے مِلݨ وی اوکھے ؍مشکل تھی ڳئے ہَن۔

شاہ عنایت دے ایں انقلابی کیمون دے فقیریں کُئی موصول ، ٹیکس نہ ونگار نہ پٹواری نہ کن گو دا حصہ ݙیوݨ پوندا ہا ۔ٹی وی اخبار دے ہوکے بغیر ایں خوشبو دار سماج دی پرے پرے تئیں بَھل بَھل مچ ڳئی ، اے خالی سانجھی رڑھ واہی دا کمال نہ ہا پر جو حاکمیں دے بوں مچے نظام ، ٹیکسیں دی بھر مار ، تے غلط زمینداری دے چکر وی ہزاراں کسانیں کوں اللہ دا ولی شاہ عنایت دی انقلابی تحریک دے مرکز جھوک شریف اِچ پناہ گھنݨ تے مجبور کیتا ۔ جیڑھے علاقے دے مزیرے اتھاں تک نہ آ سڳدے ہَن اُنہیں کوں جیڑھے ویلے موقع ملدا ہا او زمینداریں کنیں اے مطالبہ کریندے ہَن جو اِتھاں وی شاہ عنایت آلہ طریقہ شروع کرو ، کجھ کمزور وݙیرے ہولے ہولے تے تھولے تھولے ایں طریقے کوں شروع کرݨ لڳ پئے ۔

مُکدی مکائوں ڈھیر سارے ضلعیں اِچ شاہ عنایت دی تحریک پھیلݨ لڳ پئی ۔ جیویں جیویں کسانیں کوں وِتھی مِلدی ہئی او ایہو جیہاں خنگاہیں تے دائرہ بݨاوݨ پئے ڳئے تے مسافریں ، مسکینیں تے طالبیں کیتے لنگر خانے وی شروع تھی ڳئے تے ݙوجھے پاسوں فقیریں دے ’’ہمہ اوست‘‘آلے نعرے دی وجہ کنوںپیر تے روایتی مُلاّں ݙرݨ تے گھٻراوݨ وی پئے ڳئے۔ کسانیں دی ایں سانجھی جاگیردار دشمن تحریک مُغل بادشاہ دیاں وی نندراں اݙٖا  ݙتیاں تے اِکوں وَل آپݨاں تخت خطرے اِچ نظر آوݨ پئے ڳئے ۔ ہِیں واسطے مُغل گورنر فقیریں کوں ٹیکس؍مسئول ݙیوݨ دا آکھیا پر فقیریں جواب ݙتا ، اے تاں شہیدیں دے خون دے بدلے مِلݨ آلی زمیناں ہِن ۔ ایں پاروں ایندے اُتے تاں کوئی ٹیکس نئیں بݨدا۔ ایں تے فرخ سیر بادشاہ کن کیٹے کیتے او ایں تحر یک دے ودھݨ تے مشہور تھیوݨ تے ݙرݨ پئے ڳیا ۔ اوں فقیریں نال رو رعایت کرݨ دے سبب میر لطف علی کوں عہدے توں ہٹا ݙتا تے 1716ء اعظم خان کوں ٹھٹھے دا صوبے دار بݨایا تے مقامی زمینداریں خوشامد تے چاپلوسی کرتے اعظم خان کوں آپݨی حمایت دا یقین ݙیوایا ۔ آہدن جو موقع دے سارے حالات ݙیکھݨ کیتے اعظم خان خود کیمون دے نظریاتی تے انتظامی لیڈر کنیں ٹُر ڳیا ۔ اوں ویلھے شاہ عنایت عبادت اِچ مصروف ہا ۔ ذکر اذکار دے بعد شاہ عنایت اوکوں سݙوایا ۔ مِلݨ تے اعظم خان آکھیا درویش دے دَر تے پہرے دار نئیں ہوندے۔

انقلابی نے جواب ݙتا۔

اِت واسطے جو دُنیا ں دا کوئی کُتا اندر نہ ٹپ آوے

وَت ہُݨ تاں دُنیاں دا کُتا اندر آ ڳیا ہا

ایندے غرور تے وݙائی کوں بھاہ لڳ ڳئی ، اوندی فخر تے غرور پھٹوڑی ناہر بݨ ڳیا۔

لوکو ! ایہو تاںانقلاب ہا ۔ سوشلسٹ انقلاب جیرھا ترائے سو سال بعد وی سندھی وݙیرے کوں قبول کائنی۔ اَڄ کھرا’’فقر‘‘ ہے جیرھا جاگیردار کوں کُتا آکھے۔

آپݨی بہادری تے روز تے نہ بلکہ عوامی تنظیم دے کٹھ دے زور تے تراّن تے…… کُئی کنیئیں نال……

ہُݨ حاکمیں ݙیکھ گھدا جو اے تاں ساݙے مقابلے دی ہک شاہی تے حکومت ہے ، ہک عوام دی پسند دا حیاتی دا نظام ہے۔

ایندیاں پاڑاں پٹݨ دی لوڑھ ہے نہ تاں جھوک سینٹ ہیئرزبرگ بݨ ونڄݨاں ہا ۔

ہُݨ کیا تھیا جو ذاتی مِلخ دا نظام چھتا تھی ڳیا ، ایندے مُنہ توں جھگ نکلݨ پئی ڳئی وَل کھندر ڳئے تے تھوݙ ݙندیں تلے آ ڳئے ۔ انڳلیں مُٹھ اِچ اکڑیج ڳیاں ۔ ایندی کاوڑ کٹھی تھیوݨ پئے ڳئی ۔ ذاتی ملکیت دے چوکیدار گورنر اعظم خان فقیریں دے لگان ؍مسئول نہ ݙیوݨ کوں لُوݨ مرچ لا تے ؍ودھا چڑھا تے فرخ سیر بادشاہ کوں رپورٹ روانہ کیتی ۔

فیوڈل بادشاہ کوں جیرھے ویلھے اے رپورٹ ملی جو شاہ عنایت آپݨے نظریے نال علیحدہ ؍اَنج ہک شاہی تے حکومت بݨاوݨ چاہندے تے وَت بادشاہ کوں بھاہ لڳ ڳئی ۔ایں تخت کوں بچاوݨ سانگے تاں بھراویں نیں بھراویں کوں ، پُتریں نیں پیئو کوں کال کوٹھیں ڈھک کھڑایا ہا ۔تے پیئو تاں پُتریں دیاں اَکھیں کڈھوا گھدیاں ہَن … تے اے تاں ہک معمولی فقیر …ایندی اے جُرأت۔

حوالہ

کتاب: شاہ عنایت شہید، مصنف : ڈاکٹر شاہ محمد مری ، جھوک پرنٹرز ملتان